梁漢文拍《用力一抱》MV透露他的神級擁抱對象（附圖輯）

梁漢文（Edmond）早前在蘇梅島度假時，不幸被玻璃弄傷腳板縫了八針，日前已拆線並立即返回足球場，但他並非落場踢波，而是為了新歌《用力一抱》拍MV。拍攝當日天氣陰晴不定，而且非常悶熱，Edmond萬歲請食雪條和飲汽水為團隊降溫，更成為小演員的英雄，拉住他合照留念。

 

最近，為配合新歌《用力一抱》Edmond發起「抱抱運動」，從上月在雷頌德紅館舉行的Thank You演唱會開始，四出邀請好友親人與他擁抱並拍照放上網，分享攬到實的幸福喜悅。楊千嬅是「抱抱運動」首位女主角，他們在一個對於歌手極具意義的紅館舞台上，在12000觀眾前合唱後大力擁抱，而他首位擁抱合照的男星是老友蘇永康。Edmond說：「我同千嬅嗰張相好靚，抱嗰下非常自然，睇到友愛。同蘇永康嗰張就玩嘢，搞吓笑!」而他與太太Karen的擁抱就非常深情和浪漫。

 

在他心目中的神級擁抱對象，原來第一二位都是男人，他說：「我好想攬到費sir，費格遜，上次佢帶曼聯來香港，當時我代表香港藝人招待佢，但只有握手無擁抱，如果佢再嚟，我一定會爭取機會同佢用力一抱。而另一位好想攬既係我超級偶像傑斯，上次都只係見面咋!」

 

拍攝MV當日雖然Edmond傷口拆線後隱隱作痛，但他仍落力地演出，乖乖聽導演嘉萍安排，嘉萍亦很錫住他，不用他做高難度動作，她甚至親自在攝影機旁大聲讀歌詞讓Edmond對咀拍攝。得到導演的包容和愛錫，Edmond非常感動，收工前主動邀請導演嘉萍來一個探情擁抱，成為他「抱抱運動」的一份子。

 

Edmond說：「人與人之間好需要擁抱和握手表達關心，但長大後發現好多人擁抱和握手都似交行貨，有啲求其無乜誠意。呢首歌就係以擁抱做題材，希望大家珍惜愛錫既人，趁有機會就好好地用力地攬到實。我發起呢個『抱抱行動』，無論身在何地，就算做完騷喺後台周身汗，只要見到自己愛錫既人，只要互相一個眼神就埋去攬攬，然後影一張相留紀念，依家係放上微博分享，之後再儲多啲相就可以制作一張『大抱相』。」

 

目前他最難忘是半年前與外祖母大壽時深情擁抱還啜咀，Edmond說：「當晚係婆婆擺壽宴，我哋出盡力擁抱，令我感到好釋懷。原來好盡情咁去表現愛錫另一個人既時候，係會有無窮無盡好深既愛喺心入面爆發，呢個感覺就係今次《用力一抱》既主題。可能我地成長文化，就算父親節和母親節與父母擁抱，都唔夠用力，有啲害羞和尷尬，長大之後都未試過用力咁攬實父母，但當試過一次真誠地擁抱之後，哈，嗰種正到痺既感覺會上癮架！」