Lolly Talk 2周年粉絲會 獻唱全新團歌《數到十》 台上分享最私密的心底話

人氣女團Lolly Talk出道兩周年，憑藉她們對音樂的熱情與率真可愛的真性情，深受廣大樂迷喜愛，為隆重其事，今天（14日）Lolly Talk假尖沙咀香港W酒店舉行《Lolly Talk 2nd Anniversary Fan Meeting》，相約近400位波板糖們見證這個八人女子組合的成長，有波板糖以仙子、青豆、雞蛋及恐龍等不同造型到場。

記者: Tommy Tang

活動上，來自叱咤903的大會司儀Donald，率先與波板糖們熱身，隨後以最熱烈的歡呼聲迎接Lolly Talk登場，她們獻唱全新團歌《數到十》，期間Ahyo成為首個忍不住落淚的成員，不時背向樂迷抹眼淚。Lolly Talk眾人分享她們踏入兩周年的心情，阿妹分享的時候鬼馬地說：「頭先我哋話邊個喊先，就會PO邊個嘅黑圖，所以大家留意我哋嘅IG啦！」Ahyo笑指已經忍了頭半首歌：「起音樂無耐已經想喊，但係我心諗唔得呀，未唱歌喎，所以忍咗頭半首歌，其實我已經好叻㗎啦。」

Lolly Talk自2022年7月11日以首支派台歌《三分甜》正式出道，期間一直以「數字」拼湊成團歌主題，經過兩年的灌溉終於「數到十」，新歌已於出道兩周年當天（11日）正式派台。Lolly Talk對於邀得吳林峰與黃偉文為《數到十》擔任曲詞創作感到十分榮幸，她們說：「呢首歌對我哋嚟講好重要，真係好感恩得到兩位我哋仰慕咗好耐嘅音樂人支持。可能有人會諗我哋嘅『數字歌』去到十，係咪就會圓滿結束呢？呢首歌正正係想講去到十，只係一個階段嘅完成，當中有好多好神奇嘅事發生咗，好多謝大家陪我哋行咗兩年，而我哋已經準備好為下階段繼續努力，Lolly Talk嘅旅程仲有好長嘅路要行呀。」

除了首次獻唱新歌《數到十》，首張大碟亦隨着「十」的出現而誕生！Lolly Talk透露首張大碟《10＋1》將於7月底進行預售，她們說：「大碟當然會收錄晒我哋由一到十嘅歌，隻碟話明係『10＋1』，就即係唔止十首歌咁簡單，仲會有首Bonus Track《0》。《10＋1》代表住呢十首歌同埋每一位波板糖，因為有你哋先有真真正正嘅『我哋』，大家仲可以換唔同封套，有相冊、有我哋八個女仔嘅Little Things小故事、有9張即影即有、仲有數字特歌別版同《Lolly Talk Little Things Concert 2023》嘅Blu-ray碟，真係好值得收藏！」分享過新歌及新碟消息，Lolly Talk緊接公佈另一個好消息，她們將推出二次元手遊，讓樂迷透過手機於現實世界「野生捕獲」Lolly Talk成員，隨時隨地都可以與八位成員瘋狂偶遇，於遊戲中儲滿指定數量的「Lolly Token」，更可以換取獎賞，線上線下都有驚喜！

接下來是遊戲時間，全場波板糖們齊齊舉牌答問題，場面熱鬧，Ahyo、MeiMei及Elka變身「小隊長」到台下近距離「監察」波板糖，除了集體遊戲，亦有幸運樂迷得到與Lolly Talk超近距離接觸，由她們親自餵食玩遊戲，台上台下表現雀躍。緊接的大抽獎環節，更掀起全場高潮，幸運兒將獲得由臺灣觀光協會香港辦事處及長榮航空贊助的機票及禮物！Lolly Talk笑指她們都很想抽機票，因為台灣紀錄了不少她們的美好時光：「今次去咗台灣好多唔同地方拍嘢，好開心，成個兩周年之旅好神奇、好難忘，有得食有得玩，真係好似放假去旅行咁。《數到十》個MV都係趁呢個旅程喺台灣拍攝，我哋仲介紹咗好多台灣嘅靚境打卡、食嘢同埋唔同嘅文化體驗，你哋去台灣嗰陣記得要去呀。」

大會隨即放映她們在台灣拍攝的「真心話」片段，片中八個成員手拖手輪流分享最私密的心底話，全團齊齊「眼淚放題」，其中Tania說：「我唔知我哋之後會行到幾遠，但係我哋會一齊行，無論去邊我哋都一齊去。」Ahyo表示參與Lolly Talk的時間，是她人生中最快樂的日子：「冇咗你哋我唔知點算。」而喊得最利害的Mei Mei說：「可唔可以應承我，唔可以丟低任何一個人，我哋點都要手拖手。」最後眾人齊齊攬到實，場面感人。

接着，Lolly Talk上台逐一分享出道兩周年的感受，亦趁機感謝台前幕後的工作人員及波板糖的支持，她們坦言家人未必完全明白為何要堅持做Lolly Talk，又或是大家亦有磨擦，甚至自我懷疑的時候，但仍然會堅持下去，眾人再次感觸落淚。特別是因腳傷休息近兩個月的阿蛋，她坦言未能與姊妹們同台的感覺很難受：「Lolly Talk試過大半年都冇嘢做，大家都好迷茫，都有諗過我哋有咩做得唔好，或者係咪要暫停？解散？到早排我整傷，屋企人真係好支持我、好錫我，佢哋又照顧得我好好，受傷嘅時候諗咗好多嘢，好多嘢唔係必然嘅，令我更加珍惜每次上台、每次同你哋見面，好多謝你哋默默等我返嚟啦！我冇事啦，我好返，我返嚟啦！」最後，Lolly Talk與全體波板糖齊齊大合照，並約定三周年再見。