溫碧霞新片《謊島美人魚》榮獲澳門「亞洲國際青年電影節」《最佳女主角》登影后

溫碧霞（Irene）日前到澳門出席「亞洲國際青年電影節」，憑電影《謊島美人魚》獲頒「最佳女主角」，這個榮譽是她月尾（30日）生日的最佳生日禮物。

《謊島美人魚》將於年底在中、港、台三地上映，對於在「亞洲國際青年電影節」中獲封影后，Irene直言這個獎是給她跟幕後團隊的肯定，老公何祖光更專程到澳門為愛妻慶祝，「佢一路都好支持我嘅電影工作，畀我好大鼓勵，我哋仲逗留澳門玩咗一日先返香港。」Irene亦感謝世界各地粉絲多年來的愛戴，「每次見到咁多衷心欣賞我嘅粉絲，自己都覺得好感動，證明咁多年嚟嘅努力冇白費，我會繼續努力拍多啲好戲。」

電影節歴屆都給予一些年輕的創作者、導演、演員機會及鼓勵，幫助他們日後更發光發亮，「近年我多咗個身分係出品人同監製，工作室會主導團隊去搵一啲較新導演、编劇及新演員，讓大家去實現電影夢。」Irene極力推介這部充滿黑色幽默的《謊島美人魚》，「電影除咗好多黑色幽默，仲有姊弟戀同親情，拍得好到位，同埋香港已經好耐冇呢個題材嘅電影，我自己好鍾意呢部戲，呢部係我近十年最鍾意嘅作品之一。」

Irene的工作室多年來推出過多部電影，而未來亦會開拍不同片種的港產電影，「今年年尾會開拍一部內地古裝電視劇，下年仲有部《墮落花》導演李卓斌執導嘅懸疑片傾緊劇本，我都好耐冇拍呢類電影。」