陳浩Edward.C 2024年首支派台歌 《 #Prelationship 》

依家年青人嘅戀愛關係咁複雜， 「Pre拍拖」
唔知你同你身邊嘅人有冇經歷過呢？ 或者講起Pre拍拖你會諗起啲咩？ 陳浩Edward.C 2024年首支派台歌 《 #Prelationship 》 除了繼續自 《 #晴天小姐 》 之後同 #KeyNg 一齊監製、Key Ng編曲、陳浩自己作曲之外，今次仲搵嚟人氣填詞人挽歌之聲填詞。 歌曲直接描述對於現時社會速食戀愛文化所誕生出來的新興感情關係 – 「Pre 拍拖」。 帶出依種關係嘅無奈以及病態； 有一些人迫不得已； 有一些人卻自願沉淪。

#陳浩 笑言覺得去揣摩依首歌嘅時候 ， 需要好多時間去代入同埋搵感覺 ：「 因為自己都係一個比較老套嘅人， 特別自己演繹一首歌嘅時候 ， 會認為自己透過音樂、透過自己把聲成為一個載體，所以必須要令到自己有感受，聽眾先可以有感覺。」 同時間，陳浩亦直言，編曲以及填詞幫助他很多：「自己細細個就已經聽同埋睇 #挽歌之聲 嘅歌詞 ，特別鍾意佢首改詞《重演一次》 ，所以細細個就幻想緊如果有一日可以做到歌手 ，一定要搵機會同佢合作 ，所以今次真係好開心，可以夢想成真 ，同時間，挽歌都保留佢一貫嘅風格，其實佢嘅詞有時候遮住個名，你都會知道係佢寫嘅，因為真係好有佢強烈嘅個人風格，而入邊有啲句子 ，我都係特別鍾意嘅，因為病態得嚟，亦都帶有一份無奈，有時候一開始唔係你特登去選擇進入依種關係，但係不知不覺間，你冇辦法咁樣被動進入，入邊除咗帶有一份盼望之外，同時間都係一種逃避，講到尾，呢樣都係一種唏噓。」

然後當佢哋三個開始討論填詞方向嘅時候，今次特登想喺歌聲，編曲， 歌詞 ，混音方面互相做更加多的配合 ，務求在4分鐘內帶出更沉浸式的感覺 ：「好似用4分鐘將你與世隔絕 ，令到你感受一啲尋常但係又唔尋常嘅事。」 然後喺過程入邊，其實歌名都一直未確定，入邊亦都出現過幾個版本，但係當有一日陳浩同Key錄完音之後 ，Key 衝口而出嘅一句 ：「其實佢又係講Pre拍拖， 同時又係一段關係 ，咁不如將呢兩隻字放埋一齊 ，組合成一隻新字， 簡單易明， 不如就叫「Prelationship 」。」 於是呢首歌名就係咁樣誕生。陳浩亦直言，監製Key Ng 除左整歌有想法，亦都好有改名嘅才華。

然後講到自肥 ，不能夠不提到MV製作部分，除咗新嘅拍攝團隊Estelle.pictures合作， 今次陳浩特登與澳門YouTube Channel歡樂馬介休合作， 搵嚟佢哋嘅女神成員 #沙貝兒 擔任女主角，飾演喺呢段「Pre拍拖」關係入面作為享受及控制的一方。陳浩坦言亦都十分感激：「講真一開始嘅時候都覺得依個人選唔可以亂搵，但係又真係未肯定搵邊一個做， 但係自從認識咗沙貝兒之後 ， 佢極度有心 ， 好快就已經話搵佢做好唔好，然後成件事好快就爽快答應咗，促成咗今次嘅合作。」 ， 同時間，陳浩都有提及， 藉住今次嘅拍攝，同沙貝兒嘅關係都緊密咗 ：「 講真，完全冇諗過佢可以過嚟幫手，作為朋友作為工作夥伴，我都好感激佢。成件事除咗工作上， 亦都有一份自肥喺度， 大家唔使埋位嘅時候，都喺度傾偈，交換下對生活對工作嘅睇法， 咁樣我覺得其實都了解咗對方好多 ， 亦都好多謝歡樂馬介休係依件事都幫助咗好多 ， 第時有機會報答佢哋嘅一定會好好做！」

最後陳浩希望這首歌帶出嚟嘅訊息交由聽嘅人自己詮釋：「我覺得呢一種係整歌嘅人同聽眾之間嘅一種隔空互動同埋共鳴 。有一啲人可能聽呢一首歌會好悲觀， 但係同時間如果你喺入邊搵到一份樂觀嘅話，其實都係可以搵到 ， 但係最緊要嘅就係，聽眾可以喺依首歌度搵到共鳴， 呢個都係其中一種做音樂嘅人最大嘅快樂。」