何展睿新年市集為太太送驚喜

唱作歌手何展睿Steve於新年前夕開展一連七日市集活動，除了把握新年黃金檔期賺錢外，原來他首次新年參加市集，並且要完成多項「任務」：「平時週六日都要教琴，咁啱今年大年初一係禮拜六，唔使教琴，咁就可以參加。自己一向親力親為，除咗為新品牌推廣外，仲會為市民寫揮春送祝福；推出動物產品為團體籌款；為新歌宣傳；最重要梗係為太太送驚喜。」

回想疫情期間，Steve 創作抗疫歌曲外，經常落區送暖，今次他更自創龍年揮春送贈市民，希望繼續送上祝福。他表示為設計龍年揮春絞盡腦汁：「之前有落區即席揮毫寫揮春比街坊，見到佢哋個個都好開心，仲大讚我有愛心，叫我加油俾心機，嗰種溫暖令到我今年一定要繼續為大家送祝福。但因為新年期忙於市集，所以索性喺呢度寫揮春送俾大家。為咗設計龍年揮春都準備咗幾個月，希望俾啲新意大家！」

此外，Steve表示於市集推出全新寵物產品、新歌《曾經擁有的⋯》跟兩隻離世愛犬有莫大關係：「因為今個月就係其中一隻狗仔做咗天使近一年，我好期待發夢見到佢，等咗一年終於今個月夢見佢哋，所以激發我學整寵物產品。而今次推出嘅動物產品一半收益會撥捐動物團體，希望略盡綿力。正因為狗狗離世，令到我充滿靈感，我將對佢哋嘅思念代入首歌度演繹，糾纏左接近七年既新歌終於完成錄音。我都藉住市集活動，近距離同粉絲推銷新歌，希望用貼地方法做宣傳！」

講到最重要嘅任務，點少得為太太送上驚喜。一向是「愛妻號」的Steve，每逢節日必定會為太太送上驚喜，記得上年情人節他為太太秘密拜師學藝學整蛋糕，但今年Steve表示時間有限，索性為太太準備「神秘自創大利是」補數：「上年秘密學整蛋糕戰戰兢兢，難度非常高，整蛋糕實在太難超越，所以今年索性設計神秘大利是俾佢。老婆比較實際嘅人，唔鍾意收花收禮物，所以真係現兜兜為佢送上五位數字嘅利是，希望真係比到驚喜佢啦！」