Mandy拍到抽筋 Feanna見床想瞓 Vian偷食炸雞充飢 Me&遠赴韓國拍MV 拍攝班底超強 兩日46小時拍攝

由「籃球女神」譚旻萱（Mandy）、「寰亞孻女」黃淑蔓（Feanna）和「長腿師妹」連家穎（Vian）組成的女團Me&，第一首派台歌《Eye to Eye》MV首播兩星期，觀看次數已達76萬，網民反應熱烈。新歌MV遠赴韓國拍攝，找來曾為人氣韓團SEVENTEEN、NCT DREAM、ITZY以及Stray Kids執導MV的製作公司SL8操刀。MV製作特輯昨晚出爐，46小時的拍攝，兩日內只睡了兩小時的Me&各有趣事，Mandy擺甫士擺到抽筋、Feanna見床想瞓，Vian更難敵誘惑偷食炸雞。

首日MV拍攝在戶外取景，由於翌日有機會打風，所以天氣十分翳焗炎熱。為免溶妝，Me&風扇不離身，不過Mandy笑言化妝團隊依然非常擔心：「成隊Crew而家極度Panic，因為我哋個個都勁多汗。」Feanna和Vian更伸手入冷氣喉降溫，Feanna表示：「大家唔好學呀，唔可以塞太入，但真係好舒服。」Vian笑言：「可唔可以整大啲？我想塞個頭入去。」

其中一幕，Mandy優雅地躺在電單車上大擺甫士，但鏡頭後的她原來拍到抽筋。她說：「Roll機前，我對住工作人員大叫『抽筋』，但佢聽唔明，所以我扮無事繼續拍，兩雙腳一齊抽筋。」放飯期間面對着美味的便當，Me&為保持最佳狀態只好忍口。Vian先問：「點忍呀？走先」，隨後轉身離去。Feanna眼甘甘望着飯盒露出可憐樣子大叫：「好想食嘢」，Mandy表示：「當你食唔到一樣嘢，就會買畀人食，呢個係我平時會做嘅嘢，好想將香港『萬歲』呢個傳統帶嚟韓國。」

但炸雞當前，Vian還是難敵誘惑，偷吃一口後露出極度滿足的表情，興奮得不斷大笑。

團隊隨後移師至華麗的酒店場景進行拍攝，初嘗Rap的Vian獲導演大讚，她難掩興奮高呼：「啱啱個Rap我以為係試，跟住佢話『Good , Next』，我相信佢哋嘅專業。」Feanna則要危坐樓梯，再將膠槍從高處拋下，見她腳揈揈面露笑容表現輕鬆，為安全起見，工作人員亦於地面鋪上軟墊。

完成酒店的跳舞部分後，Me&換上型格牛仔Look轉戰停車場繼續拍攝。製作團隊特意準備水車營造雨景，她們由天光拍至翌日天光，更一同觀賞晨光，Mandy說：「由噚日朝早5點半拍到今日朝早6點。」歷時25小時的首日拍攝完成後，Me&休息兩小時便要緊接第二天的拍攝。累透的Feanna表示已不記得回酒店休息的經過：「唔記得沖涼、洗頭，吹頭嘅過程，淨係知飲咗啖水，瞓上床就完全昏迷。」

第二日的MV拍攝取景於大宅，當Feanna見到睡床時笑言：「係時候返酒店瞓覺，雖然好多人望住，但我都瞓得着。」Me&換上可愛的粉紅公主Look穿梭於夢幻的場景中，其中一幕更被漫天羽毛包圍，唯美又浪漫。Mandy一臉滿足說：「係好純粹嘅快樂，人生有幾多次可以做呢啲嘢。」另外一幕，Vian要咬着燃點中的蠟燭，兼擺出Chok爆眼神。鏡頭前十分有型的她自爆很緊張：「個火喺前面，Feel到愈嚟愈近，好驚佢燒到我，但我又要好冷靜。」12小時的拍攝結束後，眾人興奮拍手高呼：「辛苦了！」

連埋化妝整頭換造型，兩日合共46小時的拍攝，Me&感激幕後團隊的付出和努力。Mandy說：「啲Crew全部都好攰，真係辛苦晒。我噚晚瞓咗兩個鐘，佢哋可能無瞓過。」Vian指興奮得無法用言語形容，而Feanna則一邊大笑一邊說：「我突然好開心，好多嘢講，我平時唔係咁。」她們臨離開場地前，再以韓文逐一向工作人員鞠躬致謝。

除MV的製作特輯外，想知Me&出道前的訓練歷程、三位女孩如何在海洋公園邊玩邊培養姊妹情，首次拍造型照又發生什麼趣事？就要去Highlighter YouTube Channel收睇已經播到第5集的《Keep Your Eyes On Me&》，而下集內容更加精彩，披露Me&出發到韓國訓練過程，敬請留意Highlighter YouTube Channel。