《REVISIT張敬軒演唱會》張敬軒台上宣布辦演藝學校培育新人

《REVISIT張敬軒演唱會》已舉行到第7場，過去幾晚繼續吸引圈中名人，包括近期因為AI模仿其唱腔而成為熱搜人物的尹光、Candy & Winka@COLLAR、林奕匡（Phil）、桌球運動員傅家俊、梁仲恆、Singz@KOLOR、903 DJ謝茜嘉，以及英皇藝人泳兒（Vincy）、洪助昇（Aiden）、黎展峯（Andy）等前來欣賞。為力撐軒仔，Fans繼續自發應援活動，周末更出動雪糕車免費請食雪糕。而在演唱會上，軒仔宣布將開辦演藝學校，培育新人。

尹光於前晚成為座上客，軒仔一見到對方即說：「我真係由細到大都聽你嘅作品！」全場頓時歡呼聲四起，軒仔隨即哼出尹光的首本名曲〈荷里活〉，然後續道：「可唔可以同你開Show呀？我哋就算唔唱諧趣歌……」此時尹光即回應軒仔：「唱你嘅歌！」軒仔聽到即笑說：「如果尹光哥哥版〈酷愛〉都幾勁！」接著便用尹光腔口唱了幾句〈酷愛〉，結果爆笑全場。

軒仔之後自爆，「過去呢四日，每一日朝早起身第一件事，就係開AI版尹光〈一人之境〉嚟聽，好鍾意嗰種感覺嗰種Touch，如果有一日可以請尹光哥哥做我嘉賓或者合作開音樂會，我最想同你唱咩歌知唔知？我唱小曲好叻，可以即刻同你組CP。」更即時清唱了兩句〈啼笑咽緣〉，「好希望有一日可以同你喺台上唱歌。」

軒仔與尹光的互動，令台上台下打成一遍，想不到張媽媽的出現，也令Fans們起哄。事緣軒仔看到台下的張媽媽即Say Hi，並指張媽媽穿上新衫來看演唱會，此時有Fans即大叫「奶奶」，聽力敏銳的軒仔聽到即提問：「邊個叫奶奶呀？」想不到這一問，卻引來更多Fans大叫「奶奶」，叫聲此起彼落，軒仔也弄得啼笑皆非。

其實這只是Fans們愛錫軒仔的表現，而他們的愛，在今次演唱會亦可見一斑，他們花盡心思，除了各式各樣的場內應援，在周末的時候，更包下雪糕車在會展外免費派發雪糕給Fans、入場觀眾、市民及遊客，在炎熱的天氣下為大眾消暑。

在音樂事業上獲得輝煌成績的軒仔，深受客戶愛戴，就以今次演唱會為例，便獲得Tiffany & Co.贊助分別價值超過100萬的頸鏈及逾70萬戒指，為演唱會的服裝增添不一樣的格調。軒仔的實力，成就他的亮麗成績，而他打算將畢生功力，傳授給新一代， 在演唱會上，他宣布將開辦演藝學校，「喺呢20年累積咗唔同嘅經驗，例如舞台上嘅、待人接物、處事上等等，喺今年，我會開始帶小朋友、帶學生。演唱會過後，軒公演藝學院喺7月會公布招生，如果各位有志喺音樂界、娛樂圈發展，又或者爸爸媽媽放心將個小朋友交俾我嘅話，可以嚟報名，我會將我由細到大喺音樂上面識嘅嘢教俾佢哋。」有關詳情，將於稍後公布。