莫麗淇年薪6百萬 參演妮歌潔曼新劇 香珮汶疫情下為囡囡推Job

飛機師藝人莫麗淇（Niki）、媽咪級Model香珮汶（Monique）、陳倖瑤（Ciwi）、關悅鳳（Angela）、小豆呢日為網絡平台UpLive拍攝廣告，邀請著名攝影師Raymond Kam操刀拍。莫麗淇Niki近日被封「半億主播」，她賺取半億平台貨幣，市值近六百萬港元：「疫情下有咁嘅收入梗係滿意啦，但係就唔刻意諗點花呢筆錢，留住先囉！早前我有份參演妮歌潔曼嘅新劇《Expats》，劇組真係超級細心，有專人會照顧你凍唔凍、幫你換鞋，仲有人哋嘅特技、置境真係好勁，突然間成個場境橫風橫雨！不過導演同妮歌潔曼有冇「打大風」？呢啲唔好講啦！近日可能受到疫情影響，暫時都未收到拍攝通知，咁我都會Ready個期隨時拍攝。」

受到疫情影響，Niki的飛機執照慘變「雪藏牌」，她笑言要花時間再進修「操機」：「其實我都好熟揸飛機嘅，可能要半小時去Warm up搵翻啲感覺，要等到冇疫情嘅時候，返翻去美國再進修吓個飛行知識。」

同場的香珮汶亦受疫情影響，暫停愛囡的廣告工作：「因為囡囡只係得兩歲，工作就推晒唔敢接，而我做嘢都要問清楚啲先，例如工作人員打齊針未？如果太多人嘅場合都未必會做。」。她指去年直播收入甚佳，囡囡不時「亂入」呃禮物：「其實做Live囡囡會冇啦啦入鏡，啲人見佢咁可愛，就會送禮物比佢，大家幫佢改咗個名叫『小主播』，佢由細細個開始，已經自己識賺奶粉錢，仲要比我有天份，睇嚟我未來會係佢嘅『星媽經理人』」。

而關悅鳳（Angela）疫情逼近打亂大計，幸好早前聖誕節時與堂家姐在家中下廚煮聖誕大餐，成功取悅家人長輩！