林穎彤第三年續任CashingPro代言人

連續第三年擔任CashingPro優尚信貸代言人的Bella林穎彤，早前拍攝新一季度廣告的她，繼續以百變造型示人，還加入不少搞笑內容，另外製作團隊亦準備了一大箱印有Bella肖像的道具銀紙作拍攝用，可見製作非常用心，一絲不苟。「第三年可以同CashingPro合作，內心非常感恩，為咗今次拍攝，我仲專登減肥，兩個星期冇食晚餐，希望可以令包包面上鏡瘦啲，因為上一輯廣告，客人喺旺角買咗個成座大廈咁高嘅廣告招牌，如果我可以瘦啲，到時張相放到幾大張都唔使怕啦！」

至於多個造型中，Bella最喜歡是CashingPro女郎的專業造型，但講到最受現場工作人員歡迎，一定是爆炸頭主婦LOOK。

「髮型師絕對應記一功，仲喺爆炸頭上加咗幾個髮捲，令整個主婦LOOK更搞笑有趣，但其實咁多個造型，最高難度係扮OL，因為導演想拍出由早到晚嘅效果，我哋要喺黃昏前埋位，一直拍到日落天黑，一shot直落，唔可以NG，我同其他幾位演員，遵照導演指令去走位，前前後後拍咗超過半小時，雖然廣告出街，因為調教咗快鏡，只係得幾秒，但全部人依然好用心去完成呢個鏡頭，大家都好開心、好享受。」

廣告獲續約，Bella近日更在《萬千星輝頒獎典禮》獲提名「飛躍進步女藝人」以及「最佳節目主持」，好消息可說是接二連三。

「其實今年入圍嘅對手非常強勁，能夠有提名已經好開心、好幸運，過去一年，我主力喺綜藝節目上，所以2021年最大心願係希望觀眾可以睇到我另一面，會繼續做好主持、唱歌、拍劇，新一年最大心願係成為一個全能嘅藝人，同時希望有機會唱到自己有份主演嘅劇集主題曲、或者片尾曲。」Bella說。