[浩楠飲食] 荃灣三坡坊小店「佳坊」小炒火鍋同樣出色

2020-02-18 浩楠

荃灣食肆林立，今晚路過荃灣三坡坊就比這間「佳坊」特色美食吸引左入去，咁就入鄉隨俗，融入大排檔的文化。大排檔環境雖然草根，但勝在夠鑊氣、多花款。如果想食鑊氣小炒或者整個火鍋爐暖暖身，一定唔可以錯過三坡坊嘅小店「佳坊」。
今次點左德國咸脆豬手、炸大腸、招牌手撕雞、乳豬海鮮豬骨煲、咸檸樂，樣樣野都大大份夠晒我地5-6個人食。
德國咸脆豬手
師傅早一日已經醃好晒啲咸脆豬手，首先將豬手塗上調味料，再風乾一晚先夠入味。咸脆豬手皮層脆卜卜，外表雖然睇上嚟略為乾身，但入口肉汁鎖住晒，肉質幼滑，肥而不膩。
炸大腸
炸大腸最緊要洗得乾淨，佳坊嘅炸大腸完全合格。賣相方面，小店棄用傳統一圈圈串起嘅方法，反而改用沿豬腸內壁直切，確保唔會隱藏污垢。師傅話炸大腸最緊要有耐性，咁樣食落口先會有先爆脆後爆汁嘅口感。
招牌手撕雞
師傅提前一晚用秘制醬油醃好風乾，輕輕炸乾後掛起放涼，直到上枱前一刻先起肉拆骨。一般手撕雞都係油鹽浸再加麻油，這個手撕雞有點像燒雞，外皮金黄乾身，肉質细滑，完全無肥膩感。
乳豬海鮮豬骨煲
熱辣辣脆卜卜乳豬+新鮮海鮮（蝦、蟹、花甲）+雞腳+蔬菜一煲大大煲，樣樣都有，加埋個胡椒豬骨湯底，一定食到飽，我比較大食，最後叫多個白飯，用靚湯底整番個湯飯。
大大杯咸檸汽水
食到口乾乾，諗住整返杯嘢嚟飲下？呢個巨型玻璃樽嘅份量一定夠你飲！