UTO財經|超人的能量 | 林超榮: 今年點派錢

林鄭推出百億紓困措施，有如觀音大使遍灑甘露。我輩最開心的是聽到，係六十歲就可以有兩蚊雞乘車優惠，可惜，我還要等兩年。

不想等，最快的話，就是等財爺派錢。財爺放晒聲氣，又再派錢。街坊聞一人一萬。

我睇打個五折，都非常雀躍。不過，今年，政府財政赤字，一人一萬，破產都唔掂。

左度右度，兩個考慮。一係，派幾多？二係，派給誰？

呢個世界，派錢。一個目的，志在開心。好似新年派錢。一係，拜年派利事。人人有份。一係，春茗大抽獎，好運者得。抽獎話就話，獎金豐富，但係，未必人人開心。相反，派利事就錢少一點，大家平等。

正所謂，不患寡，而患不均。政府派得過癮，收得開心，最好都係無差別派。一人二千，個個有份，雖然話，少過去年四千的一半，但是，四千是抽獎，好多人無份，我就眼紅了一年。

人總有僥倖之心，不勞而獲。全港市民，明天張開眼，就有二千蚊入袋。唔開心就假。

一家四口，全家有八千蚊收入。不要以為小恩小惠，問下自已，春茗抽獎，咁多年，你抽中過未。咁大個人收利事，又收過二千蚊一封未。

不要再搞退稅、免租、減差餉……現金最實際。

派一萬就太多，派四千手續太煩，無差別派錢，要政府負擔得起，兩千蚊，直接有效，最動人心。

林超榮