UTO娛樂|超人的能量 | 林超榮: 無緣做小矮人

　　今年暑假颱風不多，因為，香港自己刮起的巨風，比大自然的颱風破壞力更大。叫他七月風暴，有人反對，因為有個暴字，暴風之下，即係暴徒。它只是一個騷動，不叫風暴，就叫風騷。這三個月的動盪，難以風騷，沒有人是贏家，個個都是輸家。

最大重創區是旅遊業。酒店叫苦連天，房租大劈價。

平時，我和內地導演開會，都係請我北上傾談。這些日子，我大力邀請他們南下，食宿費我包，仲應承帶他們四處去玩。公司旁的酒店，一晚雙人客房，二百四十蚊有交易，送早餐，我陪他吃了個早餐，一位收費三十八蚊，茶餐廳價錢，酒店式消費。

二百五十蚊一晚，真係抵過住「劏」房，租一個月酒店，打個九折，都係六千蚊，仲有早餐，冷氣歎，同女朋友share一半，每人都係三千蚊，真係九月好風騷。

我話，唔係日日有暴徒，帶他去海洋公園，不用排隊，玩機動遊戲機，睇海豚表演，小貓三兩，可以上去餵下海豚。再去迪士尼，上山頂，遊地質公園，鯉魚門吃海鮮，睇日落……香港從未咁抵玩。

苦中作樂，迪士尼如蕭條，真係欲哭無淚，我的編劇小友，悲從中來。

他是迪士尼狂迷，本來應徵米老鼠樂園兼職，躋身樂園工作是畢生夢想。那怕大熱天時扮小矮人。可是，米老鼠無生意，不請兼職，無緣親近米老鼠，少年夢想落空。

林超榮