溫碧霞入行36年舉行首個個唱 門票今日（15日）正式公開發售

歌、影、視三方面一樣掂的溫碧霞（Irene）當年15歲憑電影「靚妹仔」一炮而紅，再因電視劇「火玫瑰」中海潮角色更紅上加紅，隨即被唱片公司發掘Irene不單止識演戲，歌喉仲好出色，歌聲更被喻為似鄧麗君，Irene當年推出的唱片銷量相當不俗，仲熱賣到大陸，由91年開始推出第一張大碟「溫碧霞Irene」，之後在短短幾年間共推出過8張個人唱片。

其後因在內地發展，及專注拍電視劇和電影，暫停出唱片好一段時間的Irene，為答謝36年來香港的粉絲一直以來支持，決定於6月19日晚假旺角麥花臣場館舉行首個個唱「溫碧霞海潮演唱會2018」，門票今日（15日）正式公開發售，每張門票分別為$680、$480。

早前Irene為演唱會拍攝了兩款海報，其中一款背景布滿鮮花，另一款則赤膊玩黑白feel，最後Irene選擇了露肩的型格黑白feel作為今次演唱會海報，Irene解釋：「黑白feel好似我嘅性格咁有個性，我想我嘅演唱會畀大家睇到真正的溫碧霞，唔單止識演戲，其實我仲識唱歌同跳舞。」Irene並率先透露到來會唱自己演過的電影、電視劇主題曲，與及其他歌手的經典金曲。