雷晴雯賀好友港創首校 美容專家獲肯定感驚喜

藝人雷晴雯 (Winnie) 早前出席由星級繡眉師 Carey Cheung 開辦，全港首間專業繡眉學院 Careyou Eye Brow Academy 開幕派對，當晚到賀名人眾多，場面非常熱鬧。 Winnie 與 Carey 為相識十載好友，兩人從剛剛在美容事業上起步，發展到現在都分別各自闖出了一片天，兩日均異口同聲表示說，彼此的惺惺相惜與互相加油鼓勵，才是這份友情最難能可貴之處。

Carey 笑著憶述：「十年前我剛剛學成返港，事業剛起步不久，Winnie就嚟揾我繡眉同眼線，或者同行關係啦，當時我地已經勁多嘢傾，但我從來無諗過當晚Winnie返到屋企會將成個過程寫晒喺佢自己個 Blog 度，仲將我讚到天上有地下無，當時真係好開心，因為真係無諗過會有人咁 Appreciate 自己所學同所做嘅嘢，仲要係我有收佢錢添喎！」Carey笑言Winnie簡直蝕晒俾佢。

曾經也是美容導師的Winnie對好友的成功感到與有榮焉：「做老師其實壓力好大，整個教學過程，不止要為自己負責，更必須為學生同佢哋嘅前途負責，當中嘅愛心同耐性真係少啲都唔得。」 早前 Winnie 以美容專欄作家身份為無線新聞節目《星期日檔案》講述微整形風險，Winnie表示當日看到記者給她的留言時著實有點不敢置信，坦言從未如此開心過：「當日記者係憑我個網名大海撈針咁揾我，難為佢喺各大討論區日日狂留言只為升級可以PM我，足足差不多成個月先同我連絡上，仲要後尾先知我地有Common Friend，我真係勁唔好意思，但呢次經驗對我絕對係一個非常大嘅肯定，亦令更多人睇到我美容專業嘅一面，真係無比感恩。」 問Winnie專業被認同肯定豬籠入水，Winnie聽罷隨即大笑：「宜家寫作人啲字邊值錢架，有稿費收已經好開心架喇。我反而希望將來可以圓自己心願，出返一本屬於自己嘅書就真。」