鄭中基農曆演唱會宣佈加場 1月27日年三十晚 明日11月2日信用卡優先訂票

由「掌賞娛樂」主辦、《FWD富衛 鄭中基PLAY IT AGAIN世界巡迴演唱會》自從完成澳門首站後，Ronald鄭中基馬上宣佈成功攞到紅館檔期，於2017年1月28、29日，即大年初一及二舉行兩場入行20周年演唱會。

對上一次紅館個唱已經是2006年十年前，歌迷或許餓歌太久，所以信用卡優先訂票一開售，火速在3小時內全數售罄。歌迷反應熱列，Ronald決定公佈好消息：「非常非常多謝大家支持！和製作單位商量後，決定加開一場，日子係1月27日年三十晚，信用卡優先訂票會於明天（11月2日）發售。至於公開發售門票時間可以留意我Facebook及主辦方公佈。」

Ronald笑言，現在欠下一身飛債，加場都擔心還唔晒，事關由他一開始宣佈要在香港開演唱會，不斷收到親朋戚友來電要訂飛，說：「我自己都好手緊，有想過上網幫朋友㩒飛，但想到同歌迷一齊上網爭，我又唔忍心！現在每日接電話都好緊張，會想好用什麼原因回朋友免大家失望，希望加咗場，自己夠分。」

另一個解決辦法，Ronald決定將分飛重任交托太太余思敏，說：「近日朋友打俾我，我都講唔好意思，演唱會飛太太全權負責，大家聯絡她吧！」而提到囡囡Emma，Ronald指她已開始籌備上台做爸爸個唱特別嘉賓，他說：「Emma有少少音樂天份，會自己作歌仔填埋詞，同我一樣已開始為演唱會在揀歌，就像一個專業歌手，每日都會改變主意要唱另一首，所以到時會唱什麼歌，要上台一刻才知曉。」