有種歌手何韻詩開演唱會搞社企 二百多個獨家贊助商全力支持

「有種歌手」何韻詩日前於九龍城香港兆基創意書院舉行《Dear Friend》演唱會記者會，邀請了230個贊助商出席支持，當中百多個贊助商帶同紀念品出席。阿詩﹕「好多謝咁多人嚟支持我，仍然相信喺香港有咁好嘅人，好有人情味。」問到點解演唱會海報要用黑色，佢話﹕「黑色有好多層次，包含好多顏色喺入面」，意思就好似有好多人支持自己咁。

問到演唱會進度，阿詩表示o依家度緊rundown同舞台：「今次會開四面台，至於會唔會加場就真係要睇下啲飛賣成點。今次啲飛冇咩陰影位，會盡量控制贊助商唔可以hold太多，保證最靚最貴嘅飛都可以買到，有七、八成嘅飛可以買。」

她表示今次演唱會的分別是自由度很大﹕「因為每一場製作費都要幾百萬，自己都不計成本，只係想台、燈、聲都好啲。嘉賓? 不嬲都冇嘉賓嘅，我覺得人哋入嚟係睇我，總之希望打破舊有嘅方法搞騷。」因為阿詩覺得以往紅館做騷方法好舊，想試新嘢。

演唱會翌日就公開賣飛，阿詩話自己好緊張，仲一定會check住啲飛賣成點，再決定係咪會加場，佢又話﹕「其實就算加唔到場，呢兩場已經代表好多嘢，所有觀眾都係真金白銀咁買飛，都有二萬幾人。比起有啲人開十幾場，但有啲觀眾唔係真心支持嘅值得好多。」

同時阿詩亦剛成立了「十八種香港基金」，並會將演唱會贊助金入面一部份撥入基金，暫時數目有二十幾萬，自己也拎幾萬元加到總數有三十萬放落基金。

被問到基金用途？阿詩話﹕「啲錢會用嚟幫助社區、小店、創作人，但係等我做咗演唱會先。呢個project喺之前做「十八種香港」時已經好想做，不過一路拖到o依家，其實「十八種香港基」係社企，唔係慈善基金。原因係慈善基金好多規範，反而社企就可以靈活啲支持下啲小店，幫助下啲有需要嘅創作人咁，不過都要睇情況，自己正式要點做都未知，要完咗演唱會先知。」

當日出席的其中一位獨家贊助商眼鏡品牌Via Eyewear 表示十分支持阿詩開演唱會：「我們公司認為型格、旅行、音樂都是無界限的，而阿詩嘅型像同我地嘅太陽眼鏡品牌好配合，一個無界限嘅有種人，一定要支持。」

文、攝：晴天口琴手