《猛龍特囧》雨僑、唐貝詩同猛男大玩泡泡足球

《猛龍特囧》重頭宣傳「御一龍集團呈獻：香港網絡男神選舉」，昨日進入第四回合，候選男神由《猛》片導演兼主角胡耀輝(Mark)和雨僑(Ava)、以及星級瑜伽導師和藝人唐貝詩(Lydia)率領下，進行瑜伽集訓及大玩時下最hit的玩味運動Bubble Football (泡泡足球)，一眾男神笠住大汽球橫衝直撞，令在場工作人員笑到肚痛。

昨日導演將男神分成兩隊，每隊四人，餘一人後備，另一位參賽者9號鄧嘉傑因事缺席；Ava和Lydia亦跟候選男神一樣笠上大波波，負責守龍門，Mark則擔任球證。球場一開始，孔武有力的8位男神亂撞廿四，個個碌低後都難以翻身，不停躝地掙扎，Mark就搞笑地在球與球中間的罅隙穿插；至於Ava就一度被夾在龍門郁唔到，反而Lydia非常強悍，出盡飲奶力推開男神，結果最終雨僑一隊以一比二慘敗Lydia手上。

以硬骨頭為由投降瑜伽訓練的Mark，為泡泡足球做完球證後即笑說：「以為一個純足球比賽，原來加上bubble係好有趣─最好身手嘅男神，亦只會同女神打成平手、勢鈞力敵。見啲男、女神咁好身材同身手都一仆一碌，令本來想玩嘅『硬骨頭』即刻縮沙縮唔切！」Mark一身骨頭唔夠撼，雨僑亦自嘲：「我覺得果然所有《猛龍特囧》宣傳都好貫徹我戲入面形象，甩甩漏漏輪輪盡盡咁。我第一次玩Bubble Football好彩負責睇龍門，因為我平時冇踢開足球，連球例都唔知，咁我又好笨重，淨係識得守住個龍，中間仲自己夾住係個龍門度，俾人入波最後仲俾人贏咗。」在球賽中大殺三方的Lydia則說：「我第一次玩覺得好得意，我諗最得意係可以好暴力咁撞人唔會受傷，同埋我覺得自己守龍門好有天份。」