劉以達中意龍小菌把聲唔似王菲

劉以達到茜利妹及邵子風主持的節目《娛樂後援會》受訪，茜利妹原來比龍小菌更早與劉以達有音樂上的合作，她說：「早於01年，達哥創作嘅《水底樂園》專輯，featured咗唔同歌手，我當時與林一峰、少爺占及林二汶組嘅樂團《3P》，都有一首歌叫《作狀》收錄在內。」

劉以達即時記起，道：「係呀！果時我都未溝我老婆！隻碟有好多勁人㗎，張學友、葉世榮、范曉萱、夏韶聲、蘇永康、陳潔儀……嘩你keep得幾好噃。」

談及與龍小菌的合作開始，劉以達謂：「當時喺一個頒獎禮後台見到呢個面具（還戴面具的龍小菌）『飄過』，嘩！覺得好high！因為我喺《達明一派》之前，solo演出時，都係戴面具嘅！當時我自製紙面具，邊彈邊溶，一樣咁high！」又話一聽龍小菌把聲就嬲：「佢把聲唔妥！冇一個歌星似（意指唔似任何當紅女歌手）！又唔似王菲！最鬼憎啲女歌手扮阿菲唔認！好似邊個邊個呀…… 嬲呀！佢（龍小菌）自成一格，咁我先likey佢！」實則讚之。

談到與小菌合作的新歌新MV，劉以達大讚MV導演邵子風：「呢個導演有料到呀！拍之前行晒位俾我睇，清晰指導！好嘢！」邵子風則回應：「我行晒果啲位，佢（劉以達）一步都冇跟， 仲好嘢！」全場爆笑。

訪問途中劉以達又反客為主，變身主持，反訪問邵子風何時開新作，邵子風謂：「踱好晒啦，一系列《方丈微電影》，你（劉以達）預備好未先？」劉以達回應：「我復出咗好耐啦！等你咋！」一老一嫩有火花。