制作新碟挑戰極限，何展睿為媽咪送上聖誕禮物

唱作歌手何展睿Steve即將推出最新專輯《音樂的意義》，相隔四年再推出新碟心情既興奮又緊張：「成隻碟係鋼琴純音樂，自己一手包辦創作同編曲，仲親身上陣彈琴。每首歌都有佢嘅故事，其中一首係紀念幾隻上咗天堂嘅毛孩；另一首就係16歲作嘅歌，記得嗰陣要應付公開試好大壓力，呢首歌就係自己對自由既渴望；而最重要既作品一定係作俾媽咪嘅《手心的溫度》，首歌製作咗半年，因為想親身經歷多啲，由佢昏迷到蘇醒，努力踏上復康之路，真係點滴在心頭，阿媽令我看透人生同名利。推出呢張純音樂專輯，希望透過音樂比大家寧靜同安慰。」

講到制作新碟，Steve 表示錄音及拍攝同樣為出道至今難度最高：「專輯以治癒為主題，所以決定去日本沖繩拍攝海景。點知去到現場見到好多人，自己又好驚大庭廣眾拍攝，好彩聽到海水聲心情就平伏。為咗拍黃昏靚景同時間競賽，最後有啲鏡頭都係自由發揮！至於錄音更加係挑戰極限，幾年前試過現場一take錄一首歌，今次更加大膽，現場連錄七首歌，錄咗幾個鐘。但心情反而冇咁緊張，可能因為隻碟意義深重，想送俾媽咪當聖誕禮物。」

新碟本月底推出，為配合「治愈音樂」主題，Steve更特意隨碟附送親手制作治癒產品：「除咗聽覺之外，特登配合自己香水品牌推出香氣產品，分享自己同媽咪一齊經歷復康甘苦過程。聽眾可以係聽覺、視覺同嗅覺得到放鬆，希望大家睇到我嘅用心，多多支持！」