王浩信直播間「見工」？直播女王ViVi親自面試

2024-11-07 浩楠

王浩信（Vincent）離開無綫之後，全力發展個人事業，近日有影片流出，一身斯文知性造型，十足《黑色月光》成風的形象，認真煞食，咦？！原來他去Mixx Collection直播間「見工」？在場職員都心心眼，嘩嘩聲，連創辦人兼直播帶貨女王ViVi Chan都親自跟Vincent面試，即場考驗對直播產品的熟悉度……

王浩信一見ViVi即大方承認「見工」，ViVi即時考驗他臨場反應

首次於香港開直播大馬粉絲都追捧

原來係搞笑創作影片，王浩信與ViVi一齊同大家開下玩笑，目的都是為了二人首次合作直播的宣傳。日前直播出街，Vincent果然好識「連戲」，與「見工」當日的裝扮一樣，知性造型，迷死直播間的女同事。一向口齒伶俐，專業做直播的ViVi都化身小粉絲，表示「暈晒浪」，講笑：「我同現場同事都一樣，你講咩都聽唔到啦，望住你個樣，你講咩都係好！係啦，今日呢個護膚系列有咩呢？呢個系列有王浩信！」Vincent 大笑「無呀，我淨係喺呢個直播出現㗎咋，俾你搞到我講嘢都窒晒。」說笑後，二人專業做直播，Vincent直播期間，親自試面膜及美容儀器，坦言首次於香港直播，覺得跟觀眾距離好近，好有親切感。

不少網民留言「王浩信，好正」，更留言「我訂嘅貨，王浩信摸過晒先用」，亦有粉絲表示自己來自馬來西亞，都追捧訂貨。Vincent亦於直播期間，即場親筆簽名靚相贈網民。

瘡瘡大爆發自此更在意肌膚保養
ViVi發現Vincent皮膚好好，讚他得天獨厚，臉上的肌膚如此彈滑。原來Vincent對護膚非常有心得，源於一次嚴重爆瘡。「我以前好鍾意晒太陽，而且唔會搽防晒，令到皮膚唔健康，加上忙於拍劇，每日都要長時間化妝，每日帶妝時間長達13-14小時，幾年前曾經爆瘡好嚴重，臉上長滿粒粒，影響拍攝。」自此他就好注意肌膚的保養，清潔、保濕、去角質等基本護膚程序都做足。Vincent更贈網民貼士：「夏天睡眠時大家都會開冷氣，吹完冷氣一晚條紋都深啲，建議大家用面霜或保濕液厚敷，保持皮膚濕潤，冇咁容易起紋。」

Vincent更鼓勵網民要多做運動，ViVi追問他日常飲食，他表示飲食比較清淡，如要操肌，會戒澱粉質，不過也坦言，自己已經40+ ，不能吃得太乾，缺少脂肪，皮膚更加容易出紋，整個臉容看起來會很憔悴。最後，ViVi與他一同建議網民要識揀合適自己的護膚品，勤加保養才是王道。