黎展峯、陳可瑩、Anna hisbbuR現身「Z世代咪高峰會」訪問

歌手黎展峯（Andy）、陳可瑩（Charlie）及唱作女歌手Anna hisbbuR今日（4日）到新城接受T.MAX及JY主持的「Z世代咪高峰會」訪問，3位同期出道的歌手，不約而同推出新歌，Andy表示：「我首新歌《免費升級》係講升級自己心態，有時做嘢做得多會好苦悶或者無聊，但都要時刻提番起自己團火，帶畀大家正能量。」

而Charlie新歌《最佳食用日期》呼籲大家不要浪費時間，「意思想講，我年紀都唔細，所有嘢都唔可以等，例如約朋友出街，會成日講下次再約啦，但好快會冇咗件事，又或者想學某啲嘢，又會諗等下次有錢先，但真係唔好等，想做就去做。」

至於Anna hisbbuR則宣傳歌曲《I go to school by bus》，她透露自小已不喜歡上學，高中乘坐巴士期間，曾有段時間十分恐懼，過程更出現幻覺，所以她將這些經歷在MV內呈現出來；Anna hisbbuR亦直認恐懼是源於自己，「因為驚面對群眾，係天生特質，不過做咗藝人之後，多咗做創作就舒服好多，唔使咁刻板。」