柳應廷為新歌〈月居人〉搬遷到月球變身獨居老人  恭碩良參與編曲　用音樂營造一場外星大戰 

 繼〈筆觸男孩憂鬱之死〉及〈約齊靈魂在墳墓開生日派對〉後，柳應廷Jer今日推出本年度三部曲的第三首作品〈月居人〉，他更化身獨居老人進駐月球，究竟今次又是怎樣的一個故事呢？

 來到第三首〈月居人〉，亦終於揭曉Jer今年系列歌曲的主角，原來是月亮！Jer介紹三首歌的關係，說：「三首歌其實好想講同月亮有關係嘅故事。〈筆觸男孩憂鬱之死〉裡面有句歌詞係『月有眼光和我拓荒服侍癮』，月亮喺MV入面係一個被動角色，喺漆黑之中做背景，build up歌曲氣氛；〈約齊靈魂在墳墓開生日派對〉入面，靈魂會『呼喊月圓』，主動同月亮講一啲說話；今次〈月居人〉，我就化身飛上月球獨居老人。」梁柏堅的歌詞，講述主角想遠離其他人寧靜過活，所以從地球逃離到月球，但一班拿著武器的人們，為求開發資源，入侵月居人的世界，結果免不了一場在月球上發生的攻防戰。

 這個從寧靜到爆發大戰的故事，從歌詞上已經可以感受到當中的氛圍變化，而編曲亦強化了〈月居人〉整體感覺，Jer道：「因為係一個喺月球上面居住嘅孤獨老人，所以想做到孤單感覺，開端就只得一支電結他同人聲演唱，慢慢build up，去到後面宇宙大爆炸，節奏跟住加速，同時加入唔同樂器、聲音layers，令到結尾有一種世界末日，進入黑洞嘅感覺。」

 究竟誰幫忙編曲？在完成粗製版本時，監製王雙駿都有讓Jer去估，Jer揭曉答案道：「最尾知道原來係恭碩良Jun，真係超級surprise！因為好耐之前有同Carl Suk講過我好鍾意Jun嘅歌曲〈月球人〉，今次首歌某程度上係受到Jun呢首歌嘅啟發。〈月球人〉有一種宇宙大爆炸嘅衝擊，Jun唱得好rock好搖滾，一直都好鍾意呢首歌，今次咁啱又係月亮做主題，Carl Suk可以搵到Jun幫手編曲係超級開心。」Jun鼓技出色眾所周知，今次Jun為Jer編曲也露兩手幫忙打鼓，為歌曲畫龍點晴，Jer續道：「Jun不嬲打鼓勁係大家都知道嘅事實，但原來佢手結他同埋編曲都可以咁厲害！今次〈月居人〉裡面聽到嘅樂器，都係Jun佢自己，同一班樂手彈奏，營造出整體感覺，所以係好開心可以同佢合作。」今次得到Jun的加持固然開心，Jer也期待日後能有機會與Jun來一次真正的合作交流，他更說出願望，道：「唔知〈月居人〉同〈月球人〉可唔可以合作做一個crossover呢？」

 MV方面，為了配合歌曲，亦大陣仗地找來電影《明日戰記》的CG班底製作，而Jer於MV中亦化身流浪月球的獨居者，從單曲封面可見，Jer的角色因為流浪太久，留了一頭長髮，而且更變白了！Jer道：「今次〈月居人〉MV搵嚟好多嚟自唔同地方嘅CG後製人員幫手製作畫面，裡面會有啲星體，戰艦，銀河系出現，喺我拍攝嘅時候只能全憑幻想去演。」不過因為CG製作需時，就要稍後時間才可以面世，Jer也急不及待希望可以盡快睇到MV，因為他到現在也跟大家一樣，未見到MV成品呢！