歌手唐浩嘉現身潘紹聰新城《恐怖熱線》分享任職護士時醫院怪事

新城廣播《恐怖熱線》主持潘紹聰日前邀請歌手唐浩嘉（Kiko）上節目分享靈異經歷，入行前曾任職護士的Kiko亦有「唐姑娘」之稱，她分享多單在醫院工作時一些鮮為人知的事，「半夜開工其實幾驚，我哋會擺較剪同釘書機呢類金屬利器，向住門口鎮住，用嚟擺陣擋煞。」

Kiko做護士接觸不少生老病死個案，她透露彌留病人的身上會有一種特別味道，「以前做私家看護，我會喺重症病人身上聞到啲奇怪氣味，感覺到佢就嚟走，過咗兩日佢真係走咗，正常人身上係唔會聞到呢陣味。」醫院的怪事數之不盡，Kiko分享一單令人心寒的故事，「有個病人重病走咗，幾日後有個醫院姨姨喺後樓梯見到佢坐咗喺到，姨姨問個病人『點解你喺呢到？』，佢哋對望咗一眼，姨姨見到佢眼神怪怪地，跟住佢就返去，佢返去同同事講，先知個病人已經走咗幾日。有時啲病人都唔知自己已經離開咗，老人院更甚，有啲會如常返番去自己間房，同埋會聞到佢陣味。」

另一單怪事發生在一個實習護士身上，某日該實習生和職員推個遺體落醫院殮房，該職員發現遺漏物品要回去拿，便着實習生留在殮房的樓層電梯口等自己，惟該實習生等了很久都未見對方回來，於是欲致電尋人，但電話卻顯示沒有網絡，並且愈發感到該樓層愈來愈凍及燈光很暗，「後尾個職員返嚟，佢個電話突然又接收到，而且覺得整個世界都正常返，懷疑佢當時去咗結界。」

潘紹聰亦請來著名醫生李家仁一位朋友Eva上節目分享自身恐怖經歷，李家仁稱自己相信鬼神，「我信呢個世界唔係淨係人嘅世界，呢個空間有好多道空間，不過係我哋感受唔到、睇唔到，所以人鬼之說一定有，不過無論點樣，你信或不信，只要做人做得正就唔使驚。」