何展睿剛首奪「第十五屆華語金曲獎」贈留院媽媽互勉永不放棄

唱作歌手何展睿(Steve Ho)早前到小學進行巡唱，原來是次計劃早於多年前已開始，近期能重啟他表示興奮：「出道就已經開始巡唱，因為疫情停咗幾年。自己除咗想借創作發放正能量，亦希望透過自身經歷叫學生要堅持，面對逆境要冷靜正面。近幾年經歷生人身起跌同面對生死，表面上係分享經驗，其實都為自己搵到多一個途徑抒發心情。」

至於Steve媽咪早前因為腦出血入院，幸好現在康復中，脫離危險期：「之前做開腦手術，醫生都話得一半機會生存，面對生死，所有屋企人都好擔心。脫離危險期後鬆一口氣，不過康復就需要漫長時間。依加要好有耐心每一日去鼓勵佢，但佢好心急，試過好幾次炆走鼻喉管，想快啲咀嚼食嘢，我成日要同佢心理輔導，叫佢好好堅持同忍耐，因為佢係我嘅榜樣。」

而講到近期開心事，Steve 收到「第十五屆華語金曲獎 2024」率先頒發優秀唱作歌手獎，對他而言可算是雪中送炭：「因為出道好幾年，自己想做嘅嘢都差唔多完成，音樂同MV都試過自己做曬，而家好似係樽頸地帶，加上近年人生遇上好多挑戰，曾經想放一個長假休息，突如其來得到呢個獎係好驚喜，呢個創作歌手獎意義重大，係累積努力得返嚟。得獎後我即刻拎個獎去醫院俾媽咪睇，佢用力捧著個獎，講左句「叻叻！孝順叻仔」，我即刻流淚。因為人生中佢第一次咁樣讚我，我永遠記住呢一刻，要做多啲善事為佢積福！」 更揚言正如跟學生的分享，有大眾認可和鼓勵更加有動力和幹勁繼續創作更多正能量歌曲並即將推出，連繫留院媽媽一樣齊互勉永不放棄。