《KATCH OUR LIFE Jer柳應廷 x MC張天賦 音樂會》柳應廷張天賦首度合作開Show　All In演出不設上下限

由Katch音樂娛樂平台主辦，Visa 及 港鐵冠名贊助《KATCH OUR LIFE Jer柳應廷 x MC張天賦 音樂會》，將於2024年8月30日假亞洲國際博覽館Arena舉行，兩位實力唱Jer柳應廷及MC張天賦將在一夜限定音樂會裡作出不同挑戰，演出不設上下限！有關音樂會詳情如下：Visa 及 港鐵冠名贊助《KATCH OUR LIFE Jer柳應廷 x MC張天賦 音樂會》
日期：2024年8月30日（星期五）
時間：晚上8時15分
地點：亞洲國際博覽館 Arena
演出單位：Jer柳應廷、MC張天賦
門票將於6月14日（星期五）早上10時起於Katch音樂娛樂平台憑會籍Katch Point兌換活動門票，更多詳情，請瀏覽Katch官方社交平台專頁：
Katch Facebook專頁 – https://www.facebook.com/katchhk
Katch Instagram專頁 – https://www.instagram.com/katchhk_/

 

兩位實力唱將首度聯手開Show，身為當事人的Jer與MC都同樣興奮，Jer表示：「當我知道有呢個合作之後係好興奮，係咁同公司講，我哋一定要接呢個Job。我自己好期待，因為由造星開始認識MC，佢一直都係一個好唱得嘅唱將，而我亦都係以唱將形象出現，所以都已經幻想到一齊會好有火花。」MC亦同樣期待與Jer的合作，他說：「當初知道要演出KATCH OUR LIFE音樂會嘅時候，係未知會同邊位歌手合唱，嗰陣時就諗邊個會係我最期待呢？頭兩甲一定係Jer，因為同佢嘅歌路都有相似嘅地方，佢亦都係一位好出色嘅歌手，同台經驗唔算太多，今次有一個真正嘅Concert可以同佢合作，同佢一樣超級興奮。」

Jer與MC有太多相似的地方：造星出身、入行前經常Busking、懂得玩結他、唱歌音域與曲風類同⋯⋯有著這麼多的相似，二人又會期待怎樣用音樂擦出火花呢？Jer即幻想道：「應該係聲音上面嘅交流，大家好似擂台上面較量嘅感覺，好似兩個Fighter，鍛鍊咗一身武功，到時去到擂台大家會All In攞出嚟。」MC腦海裡面亦呈現了很多不同畫面，他繪形繪聲道：「可能會係各持一方，好似音樂會海報咁一黑一白，然後大家去做一個拉扯或者對抗，甚至喺台上面一齊玩樂器，或者我哋會攞我哋畢生所學嘅嘢出嚟All In，或者攞啲我哋唔識嘅嘢出嚟玩，我覺得都係幾有趣嘅一個地方。」

All In的還有二人的唱功！MC也希望可以給台下觀眾驚喜，他說：「今次揀歌方面偏向平時未必可以喺舞台上面，或者未必有機會玩嘅歌，再喺入面揀一啲再刺激啲再Extreme（極瑞）啲嘅作品出嚟，因為好多時候揀歌都要迎合某啲原因，但今次同Jer合作可以大膽啲玩多啲嘢，同埋我哋加埋嘅上限係會高好多。」Jer亦希望做出一個截然不同的音樂會，他表示：「近排大家都愛上推出搖滾、Powerful啲嘅歌，宣傳Poster裡面大家亦都攞住結他Rock Rock地，都幾期待我哋到時喺台上面變成一個Band Show，然後一齊揈頭，台下有人轉圈（Mosh Pit），講下笑，未必會，但會係一個好投入但又幾有力量嘅表演。」

兩位大男孩將會傾力演出，他們亦期待台上台下打成一片的畫面，Jer道：「希望我哋喺台上Have Fun，大家都玩得開心、過癮，觀眾亦都會睇得開心，呢個係我嘅宗旨。」MC亦和應道：「同意，最緊要Have Fun，既然其中一個目標係Have Fun，第二個目標就係觀眾都要Have Fun，大家應該要帶住非常期待嘅心情，要同我一樣咁期待，因為目前好多嘢都係未知之數，但如我所講，我同Jer會擦出一個好強勁嘅火花，而且呢個係冇下限亦都冇上限嘅火花，好似睇煙花咁，你唔知會射得幾高、幾勁。」Jer亦續道：「希望大家入場睇呢個Show嘅樂迷都會帶住一個期待得嚟又Enjoy嘅心情，最緊要大家好開心喺呢個Show度，返到屋企諗返起都依然有一個好難忘嘅表演，就算十年後諗返起，原來Jer同MC曾經做過一個咁樣嘅Show，希望會成為一個幾經典嘅畫面。」