《甘濃迎福賀新歲》見面會 薛家燕預告龍年全年無休 努力修身

踏入2024年，薛家燕先後出席多個活動忙過不停，日前（3日）她現身黃埔舉行《甘濃迎福賀新歲》見面會，即場選出心水舞王舞后並示範「有有舞」，吸引大批Fans與途人駐足欣賞，現場充滿愉快氣氛。

家燕姐早前與馬來西亞國寶級天后茜拉（Shila）推出賀年歌《有有有The Year Of YO!》大受歡迎，推出至今不足一個月，網上的點擊率已超過120萬！其中祝福大家愛情要有、健康要有、事業要有的「有有舞」更掀起熱潮，連家燕姐年僅兩歲半的孫仔亦齊齊跟住跳。為了讓「有有舞」繼續發揚光大，會上更舉辦《有有有The Year Of YO!》跳舞比賽，最後十強於台上展現最強舞技，渾身解數搏家燕姐「點燈」，有人做出一字馬、有人派心心，勝出者更獲得年初八於澳門舉行的《金龍迎福新春演唱會》門票。

作為「有有舞」的靈魂人物，她當然要即場示範舞步為參賽者打氣，家燕姐大讚他們表現落力，決定皆大歡喜齊齊獲得演唱會門票，她又親自向途人派福袋，場面熱鬧。

家燕姐透露雖然忙於為新春群星演唱會綵排，但可以與Fans見面非常開心，其中有位小妹妹與婆婆齊齊參加「有有舞」比賽，逗得家燕姐好開心：「佢真係同我孫仔一樣好有天份，我孫仔睇咗幾次《有有有》就識跳，我已經約定新抱，等佢三歲就嚟家燕媽媽藝術中心，等啲老師好好栽培佢。」提到孫仔家燕姐即笑不攏嘴。她又指農曆新年期間工作不斷，未能與家人外遊：「我都好開心可以近距離同大家見面，熱熱鬧鬧咁先有過年氣氛。」同時亦不忘宣傳新節目，笑謂要日日夜夜都陪伴大家。

雖然農曆年未能放假，但家燕姐指準備功夫要做足，團年飯一定會與家人共聚，其中包利是是指定動作：「今年要乜都有，所以利是呢啲梗係要有，我已經準備好晒，個個都話收咗我利是全年都好運。以往包利是要兩個工人幫手，今年應該要成家人齊齊包。我都好樂意將啲福氣分享畀大家，總之人人開心，家燕姐就開心。」問她可會叫孫仔幫忙包利是？家燕姐笑謂：「我驚佢包完自己拎埋，佢最叻就係恭喜發財利是。」

至於年初八的新春群星演唱會，家燕姐表示原定有性感造型：「都開到好低㗎，不過我個女話太性感，我咪叫設計師幫我拉返高啲。我無咩所謂，呢個年紀都着到，大家又睇得開心就得，不過阿女話唔好。」她表示近日正努力修身，除了忍口不吃年糕更要戒飯：「我覺得會瘦到，到時等大家見到肥家燕，唔係，係靚家燕先啱。」