薛家燕、劉穎鏇、甄濟如、王梓軒任開幕嘉賓 聯大汽車｜比亞迪九龍灣服務中心隆重登場

薛家燕、劉穎鏇、甄濟如（Jasmine）及王梓軒今日（25日）出席由聯大汽車有限公司代理比亞迪電動車首間市區服務中心的開幕典禮。聯大汽車集團主席施純杰先生、比亞迪亞太汽車銷售事業部高級銷售總監歐陽小成先生、比亞迪亞太汽車銷售事業部售後服務中心總經理助理馮二東先生、BYD (H.K.) CO., LTD. 乘用車運營總監張景榮先生，聯大汽車有限公司行政總裁崔慶銓先生、聯大汽車售後服務總監陳榮銳先生，聯同家燕姐、劉穎鏇、Jasmine及王梓軒，以及著名書法家華戈老師齊齊為比亞迪九龍灣服務中心進行剪綵，大會亦安排舞獅助慶，場面熱鬧。

會上又播放九龍灣服務中心的宣傳片段，呈現聯大汽車與比亞迪的共同理念，以最舒適、優質的服務態度關注每位車主的需要。比亞迪九龍灣服務中心佔地60,000呎，不僅提供新車交付服務，還為車主配備全方位售後維修與保養服務，中心設有10個以上的新車交付區，以及13個智能汽車升降台維修工位，讓售後服務範圍進一步覆蓋至整個東九龍區。

比亞迪亞太汽車銷售事業部高級銷售總監歐陽小成先生於致辭中表示，比亞迪電動汽車逐漸受到港人歡迎，全球用家亦相當受落，單是去年全年新能源汽車銷量達302萬輛。是次開業，是為了共同打造「服務至上」理念的重要時刻，讓香港消費者「買的放心，用的舒心，修的省心」。 同時，聯大汽車有限公司行政總裁崔慶銓先生指聯大汽車及比亞迪非常重視對車主的服務，務求一起以最快速度增設香港服務網絡，努力提升銷售與售後服務質量，而聯大汽車將在今年第二季引入比亞迪兩款新車，包括SUV型號及家庭車款，亦會開設更多的維修中心，敬請各界密切留意及大力支持。

擁有甜美歌聲的Jasmine與王梓軒為開幕禮演出，兩人更是首度同台合唱，為現場參與人士送上英文歌《We don’t talk anymore》，兩人又分別獻唱《idk》及《多得你》，讓開幕禮席上極盡視聽的享受。王梓軒大讚Jasmine唱功了得，同為唱作人的他們「聲聲相識」，他說：「Jasmine唱得好好，把聲好穩，作為新晉歌手表現真係好好，我初初出嚟唱歌都會緊張，但係我睇到佢係享受多過緊張，希望之後都有機會再合作。」

早前為家燕姐監製賀年歌後，王梓軒亦忙於為四月重演的舞台劇《利瑪竇》作準備：「雖然距離綵排仲有一段時間，但係我哋已經開始緊前期嘅工作，負責監製嘅松哥（劉松仁）都好期待，佢仲積極過我呀，不過而家仲有啲嘢籌備緊，遲啲就會同大家公佈㗎啦！」提到做車主，王梓軒笑指「恨咗好多年」，但礙於養車太貴，他說：「之前由於工作關係成日轉地點，所以都有諗過買車，但真係太難泊車同環保原因，我就打消咗呢個念頭，而家見到比亞迪啲車款好靚又環保，我都心郁郁想買車，同埋介紹畀身邊啲朋友！」。王梓軒更表示比亞迪大款車的車尾箱可以供電，甚至放得落DJ轉盤，所以都會想同朋友一面遊車河一面開流動音樂會！

至於日前宣佈大年初八將於澳門開騷的家燕姐表示，主辦已公佈演唱會陣容：「除咗我同阿佘（佘詩曼）仲有陳慧嫻、阮兆祥、陳小春、梓軒同埋聲夢歌手，到時實好熱鬧。最開心係而家可以周圍飛，今次去澳門都想同埋個孫去玩幾日，睇吓到時安唔安排到。」問到她可會考慮換車，家燕姐笑言都想轉電動七人車：「而家我每個月都要俾成8000蚊油費，我搵過資料如果轉電車一個月電費都係2000蚊，我知比亞迪將會推出電動七人車，我都想好似汪阿姐咁有人送（哈哈哈哈）！」，之後又甜絲絲說：「都會想買畀個孫，等佢第時同我遊車河。」

劉穎鏇剛剛奪得「飛躍進步女藝員」加上有入演出近日熱播的電視劇《飛常日誌》，人氣急升，除了忙於宣傳劇集，更頻頻出活動。今日一身銀黑色禮服打扮的她很興奮可以為比亞迪服務中心擔任開幕嘉賓，自己亦是愛車之人，因為忙於工作未能成為「有車階級」，問到可會買車作獎勵？她笑言會好好考慮：「我好鍾意比亞迪SEAL嘅車型，所以今次可以出席活動我都好開心，希望等等有機會試坐一下！」。被譽為TVB新一代打女的她，又笑謂下次開幕要負責舞獅部份：「每次做剪綵活動，睇到舞獅嘅師傅們都覺得好犀利，希望將來有機會學埋舞獅，我覺得女仔舞獅好有型，等下次比亞迪再開新嘅服務中心，我就帶埋隻獅嚟贈慶。」

Jasmine日前完成新歌《Forever 19》的發佈兼慶祝20歲生日，今日再為開幕活動唱歌，她說：「好開心有機會表演，我真係好享受每次演出機會，今次可以同梓軒合唱，真係好好，因為我今年其中一個目標就係想同唔同嘅歌手合作。作為唱作人，都希望自己同多啲歌手交流，咁樣先有進步，同埋大家對我呢個新人好好，好多謝大家。」