林國斌厭倦做壞人 挑戰慈父角色 與陳昊森父子情獲好評
入行多年的林國斌，飾演的角色大部份都是大奸角、大壞蛋，但今次在一月十八日正式上映的電影《不是你不愛你》中，首次挑戰爸爸角色，與男主角陳昊森飾演兩父子。
「今次做人老豆，從來都未做過，又唔使打，又唔係做黑社會，之前啲角色做到好厭，唔想拍，今次呢個係新嘅嘗試，都舒服，所以接拍。」林國斌坦白地說。
故事講述陳昊森一直將台灣籍母親自殺的責任，歸咎於生性風流、飾演大律師的父親林國斌身上，導致二人勢成水火，加上父親決定再婚，陳昊森對林國斌的仇恨更加有增無減。
「我個角色唔算係好慈祥嘅爸爸，因為喪偶，想搵過個老婆，但個仔唔鍾意，好反對，做好多反叛嘅嘢出嚟，其實冇對與錯，我想有我自己嘅新生活，佢又好掛住佢阿媽，覺得我害死佢阿媽，所以好憎我。」
雖然感情看似沒轉彎餘地，但因為陳昊森突如其來患上重病，父子關係亦因此一百八十度逆轉，戲中兩父子一場內心戲，二人放下從前的一切相擁而哭的場口，感動了不少優先場的觀眾，更對林國斌的演技另眼相看。
做慣大奸角，要在鏡頭前流出真眼淚感動觀眾，林國斌認為有了人生歷練，眼淚自然即call即到，他說：「其實要喊都冇乜嘢，我都幾廿歲，經歷咗咁多嘢，諗番以前唔開心嘅事，培養一吓情緒，就可以喊到出嚟。」
林國斌唔單只好戲，原來仲好玩得，與劇中一眾年輕演員，經常在休息時間打成一片，一起打羽毛球、打籃球，更意想不到的是，原來林國斌的籃球技術，絕不遜色「籃球女神」Mandy譚旻萱。
「我都係年青人嚟㗎，幾廿年前嘛，哈哈！初初都有啲擔心同佢哋格格不入，會唔會溝通唔到？原來唔係，佢哋都好NICE！」林國斌說。
由寰亞電影出品、寰亞電影及洲立影片聯合發行、葉念琛身兼監製、導演、編劇的全新浪漫愛情電影《不是你不愛你》，於一月十八日浪漫上映。
故事大綱
那年暑假，花園街長大，性格開朗善良的阿寶（譚旻萱飾）偶遇和父親感情不佳的富家子家偉（陳昊森飾）。為報復父親再婚，家偉聘用阿寶及其好友大強（梁仲恆飾）等人搗亂婚禮，促成他與阿寶認識並開始交往。兩人情投意合，嚐盡熱戀甜蜜，本以為緣定今生，豈料命運卻為這段愛情安排了急轉直下的暗湧…
