Mike曾比特年度廣東新歌《魔氈》首度踏足日本 爬上山丘拍MV

由髮型至唱功都極有爆炸力的Mike曾比特，今年主力不少現場表演，歌迷都熱切期待他的新歌面世。近日Mike終於回歸錄音室，推出今年唯一一首個人全新廣東歌《魔氈》，再次展現那份細膩而撼動心靈的「曾式情歌」獨有魅力。

《魔氈》以公主和勇士之間的魔法地氈為角度，以此形容一份無條件的守候和陪伴之愛。說到「曾式情歌」，曾比特過去如《我不如》、《新年快樂》已示範過感人唱功，今次《魔氈》換上甚具特色的拉丁節奏，編曲上也因應音樂類型，增添不少中東味道，音樂既充滿畫面感，也給予樂迷想像空間，跟著節拍飛馳空中。Mike在演繹上不但要駕馭今次的嶄新音樂曲風，歌曲中段更有兩句高音和假音位，而Mike亦盡展功架，再一次成就解鎖，以爆炸力唱腔把《魔氈》的難度位完美發揮。

這次MV取景日本鳥取沙丘，Mike在沙漠行星飾演一個迷失的飛行員，一直往無盡嘅沙漠行走，拖拉着、背負着是一份信念。之後，Mike遇上沙漠的守護者，一直被引導，終於找到希望。原來Mike未曾踏足過日本，「人生第一次去日本，仲要拍MV，喺一次非常特別的體驗，沒有城市街燈，只靠月光照耀着，好似睇電影咁，滿天星海嘅感覺。一路拍，一路好讚嘆大自然嘅美好，未試過咁近距離接觸大自然！」在拍攝期間，Mike多次爬上沙丘，「跨過山丘，其實仲有一個淺藍色嘅海，同天空連成一線，好似睇緊宮崎駿嘅動畫一樣！我多次跑上斜坡睇海，辛苦製作團隊拎住咁多器材同我一齊跑，結果全部人對於個景都好驚嘆。」絕對是Mike一次很難忘的體驗。

樂迷等待了一整年，終於等到Mike有個人全新作品，Mike感激地説：「一年無出新歌，多謝大家等待，而且咁長時間對我不離不棄。今次新歌對我嚟講好大意義，同以往曲風非常唔同，雖然已經喺年尾，希望俾到大家有個surprise，希望嚟緊一年會有更多新嘗試帶俾大家！」