AGA與樂迷提早過聖誕 Fans狂嗌Encore得償所願《Cathay LIVE: Music up close AGA 音樂分享會》

AGA江海迦日前於西九文化區自由空間大盒 舉行《Cathay LIVE: Music up close AGA 音樂分享會》。這是《Cathay LIVE: Music up close》的第四擊，AGA藉此機會提早向樂迷送上一份聖誕禮物，更邀得本地爵士樂大師Ted Lo坐陣彈奏鋼琴，整個演出可謂視聽盛宴。AGA在《ONEDERFUL LIVE》巡演期間特意抽空準備今次演出，為了與樂迷提早過聖誕，一切也是值得。

AGA精心準備今次演出的歌單，將所有歌曲重新改編，加入爵士樂元素，令現場充滿溫馨歡樂的節日氣氛。AGA將Jazz Standard與自己的作品融合，例如：《Summer Time》與《CityPop》串連，又將《Fever》與《Count to Ten》串連等等。每首歌都有對應的視覺效果配合，令樂迷更能投入氛圍之中。

AGA提到自己16歲第一次去jazz bar演出就是唱《Fever》，今次將自己演唱會主題曲《Count to Ten》揉合其中作改編。她又解釋今次揀選這個歌單的用意，她說：「今晚好開心，好榮幸同咁厲害嘅jazz band一齊演出，每一位都係獨當一面嘅樂手。我好耐冇開過同觀眾咁近距離嘅show，其實我入行前喺多好jazz lounge唱歌，所以今次帶咗幾首啟發我創作嘅歌曲同大家分享。」

AGA又提到入行前於國泰任職空中服務員時的往事，她說：「出道前我係一位空姐，喺做空姐嘅4年期間，見到好多聚散分離，都俾到靈感我寫歌。我會喺制服度攞張餐巾出嚟寫demo歌詞。記得當時問舒文『3年喇喎，啲歌有冇人要呀？』佢就叫我『寫多30首歌先啦』，然後再默默創作，到後來作品面世，好似係《Better Me》，呢段經歷回想起都好開心。」然後唱出《MIZU》及只在演唱會曝光過的《The Lovers》，AGA解釋這首歌在描述一雙戀人最浪漫的狀態，並預告將於明年正式推出，樂迷要密切留意。

音樂會中段AGA唱出《理性與任性之間》，之後她提到自己開始作曲的源起，要感激Ted Lo的鼓勵：「記得當時決定辭職唔做空姐時好迷惘，淨係知自己要做音樂，寫好多歌，唱好多demo。好多謝Ted Lo，佢係我入行第一個認識嘅人，佢鼓勵我寫歌，亦因為佢我先識到舒文。」

除了親自創作的作品外，AGA還挑選了三首啟發她創作的作品她說：「以前有段時間喺lounge彈琴唱歌，中間會夾雜自己嘅作品，女仔細個都會幻想有啲戲劇性橋段發生，唱唱下有人埋嚟同我講首歌好好聽，我再同佢講『多謝，首歌係我寫㗎』。雖然最後冇發生，但我好感恩有呢段時間，因為有唔同人點歌，令我接觸到好多唔同音樂類型。」接著唱出英文金曲《Will You Still Love Me Tomorrow》。

AGA挑選的第二首歌是陳奕迅的《大開眼戒》，是啟發她創作《Special One》的歌曲。她說：「細個喺屋企搵到呢首歌嘅數字譜，跟住嚟慢慢彈去學彈琴，我係彈完先認識到呢首歌。我覺得『若你喜歡怪人，其實我很美』呢句歌詞好特別，同埋首歌旋律好好聽。入行之後認識到Eason，有機會為佢寫歌，就係早前推出同佢合唱嘅《Special One》，希望大家唔需要隱藏自己嘅獨得性，搵到自己嘅Special One。」然後唱出《The Christmas Song》。

到互動環節，AGA讀出掛在台側聖誕樹上的粉絲留言，有人寫上「希望AGA爆紅，年年開演唱會」、「願AGA你與音樂常在」，她更抽出兩位幸運兒，可以到後台見面合照，預先送上聖誕禮物。

到音樂會尾聲，AGA唱出啟發她創作《Night Without You》的《Author’s Theme》，她說：「其實仲有好多歌想唱，想同大家分享，之前自己嘅紅館show全部都係自己寫嘅歌，其實爵士樂都佔咗我人生好大部份，希望之後可以玩多啲改編作品，將呢個歌單搬到更大嘅舞台同大家分享！」然後走到台前與樂迷大合照，最後唱出《Tonight》為這晚劃上圓滿句號。樂迷不捨音樂會就此完結，狂呼encore，最後AGA詢眾要求回到台上，在Ted Lo伴奏之下唱出寓意世界大同，John Lennon的名曲《Imagine》，她笑言：「好配合寰宇一家呢個主題，哈哈！」