《造星V》「做工佬」Ritchie夥拍Chit 全新合唱歌《雞蛋仔格仔餅》粉絲自資應援戶外大電視首播MV 街頭演出回饋Fans支持
來自馬來西亞的《全民造星V》海外參賽者Ritchie（梁瑋城）「做工佬」正式進軍香港樂壇，夥拍同為海外參賽者、來自美國的Chit Wong（黃哲）推出首支合唱單曲《雞蛋仔格仔餅》，以地道小食記錄他們對香港的回憶。日前（2日）Ritchie與Chit現身尖沙咀重慶大廈附近，見證首個MV戶外播放宣傳，吸引大批「工友」（Ritchie Fans）和「哲學家」（Chit Fans）到場支持，兩人更於街頭busking，獻唱多首粵、國語及英文歌，盡顯唱功。
Ritchie於《造星V》勤力用心的「做工佬」形象，成功吸納大批香港樂迷，雖然最終於20強止步，但他未有因此停止追夢，繼續邊唱邊做工，貫徹他於《造星V》的「serious」態度！新歌《雞蛋仔格仔餅》是Ritchie與Chit於賽後的創作，早前更於彩虹邨及旺角街頭拍攝MV，以香港地道文化融入歌曲，顯示這位海外參賽者闖入香港樂壇的決心和真誠。MV 由11月30日於YouTube 首播後，短短2日已衝破10,000次瀏覽量。
工友們為支持Ritchie，特意於尖沙咀重慶大廈外牆的巨型LED wall自資應援，連續14日播放《雞蛋仔格仔餅》的MV，實行為「做工佬」瘋狂造勢，不同時段會更出現兩段不同隱藏版本的影片！Ritchie感謝樂迷的喜愛與支持：「好開心同感動佢哋送咁大份禮，雖然MV喺11月30日已經喺YouTube首播，但係喺街度播嘅感覺更加震撼，所以今日特別親自嚟見證人生第一次喺戶外大螢幕出現。」
Ritchie與Chit齊齊見證MV播放，兩人不禁大呼「好開心」。每當MV於大屏幕出現，Ritchie與Chit亦忍不住與「工友」及「哲學家」們瘋狂拍照留念，又特別製作「雞蛋仔格仔餅」造型匙扣贈予樂迷，他們說：「參加《造星V》嗰陣，我哋日日都經過一間賣雞蛋仔同格仔餅嘅鋪頭，但係我哋為咗keep fit，唔敢成日食，不過呢個係我哋對香港第一個好深刻印象嘅食物。完咗個節目之後，我哋好快就夾埋寫歌，有次企喺嗰間鋪出面，見到『格仔餅一個十五蚊』就擺落歌詞入面，我哋想寫啲好生活化嘅嘢落去。」
Ritchie與Chit回想造歌的過程，笑指創作是最簡單的部份，反而派歌到不同社上平台比想像中不同，Chit說：「原來要寫自我介紹，又要擺啲靚靚仔仔嘅相，雖然唔係好難，但係我哋事前完全無諗過要準備呢啲。」Ritchie表示是很特別的體驗，尤其自己在馬來西亞做工，現在要以歌手身份介紹自己，仍然在適應緊期。他們又感謝韋羅莎隔空打氣，Ritchie說：「我哋都未send首歌畀佢，佢已經上網聽咗，好多謝佢咁支持我哋。之後都想send首歌畀Jay Fung（馮允謙），最好梗係可以同佢一齊寫首廣東歌啦，參加《造星》嗰陣同佢都好friend，希望有機會同佢合作就好。」
難得抽時間來港，他們當然要以歌會友，輪流獻唱馮允謙的《收到收到》、林宥嘉的《壞與更壞》、Benson Boone的《In the Stars》、陳柏宇的《你瞞我瞞》、小肥的《時光機》及AGA的《3am》等十多首歌曲，不少工友到場為他們打氣歡呼，現場有如小型音樂會，氣氛熱鬧。
除了巨型LED wall宣傳，Ritchie已經安排一系列的活動：「3日 會喺尖沙咀天星碼頭繼續宣傳，希望趁返嚟嘅時間，盡量做多啲，回饋返支持者。」Ritchie在馬來西亞繼續做審計師，只可以於放假期間回港宣傳：「我兩邊都咁 serious，盡力做好。我講過希望工友們一直都可以自稱係驕傲的工友，所以唔想令佢哋失望。我覺得有機會追夢，已經係好難得嘅事，所以一定唔會咁容易錯失呢個機會。今次逗留時間都好短，因為要返去準備考試，但係聖誕節有幾個活動洽談中，希望好快可以再見到大家。」
Ritchie透露來年將有更多新歌陸續推出，現時正於籌備當中：「可以透露有英文、普通話同埋廣東歌，希望明年開始一直可以持續出新歌俾大家聽。嚟緊都想多啲喺香港同埋馬來西亞，參與唔同嘅演出，多啲俾人認識Ritchie嘅聲音，希望可以嘗試唔同範圍嘅發展。此外，可以藉住今次嘅機會，睇下有冇機會同唔同嘅公司傾下將來合作空間。」他已經準備好成為「serious singer」，期待在香港及馬來西亞樂壇「做好呢份工」！
《雞蛋仔格仔餅》MV 戶外大電視宣傳活動：
地點: 尖沙咀彌敦道36-44號重慶大廈LED Wall
日期: 2 – 15 Dec, 2023
時間: 08:00 – 24:00
官方MV:
@ritchie_leong @cchitwong @ritchiespantry #梁瑋城 #Ritchie #黃哲 #Chitwong #全民造星V #雞蛋仔格仔餅
