馮素波、栢天男二人為港鐵拍攝廣告

馮素波、栢天男二人為港鐵拍攝廣告片，二人片中飾演母子，劇情講及栢天男離港在即，眾人在香港站告別。近來活躍IG的波姐特別生鬼，不時向鏡頭派心心和飛吻，仲風騷自爆常被「靚仔」邀請演出：「我唔係靚仔先接工作，係佢地要揀我咋！成街都靚仔點認得咁多，我見栢天男成面鬍鬚，下次叫佢用『鬚』拮吓我就認得啦。」

二人雖然第一次合作，但默契非常合拍，趁列車未埋站時仲齊齊排戲。波姐話自己屬「港鐵GPS」，笑言似足公主出巡：「因為我兩蚊車之嘛，成日都『出巡』周圍去，所以熟晒路啦，最遠去到柴灣、堅尼地城、西營盤啊，我嗰個禮拜都要去街架！」波姐仲話自己熱心幫遊客搵路，仲唔介意同人合照添：「有時見遊客望吓望吓，就主動問佢地想去邊度，又有啲話想影合照，只要唔介意我素顏影乜都得。」

而栢天男就話同波姐合作好開心，不過第一件事唔係請教演技，而係向對方問路：「因為今早集合地點，我搵極都搵唔到，唯有打比波姐問點去，佢真係好厲害！波姐雖然未合作過，但我有睇佢啲作品，所以感覺好親切，終於有機會演母子。」

呢日劇情講到栢天男突然帶埋太太同囡囡回港，為「媽媽」波姐送上驚喜：「現實中我都試過突然返澳洲，媽咪都嚇咗一跳，睇得出佢好開心嘅，不過佢都叮囑我下次早啲話比佢知，佢以為有賊入屋啊。」栢天男仲話不時同媽媽視像維繫感情：「我通常都會視像媽咪，問吓佢點煮飯嗰啲，而佢就會話比我知咩節目見到我。」