香港世界宣明會首辦低碳版「饑饉30」 岑寧兒、per se、Heyo、Triple G、R.O.O.T擔任閉幕音樂會表演嘉賓
由香港世界宣明會主辦的「饑饉30」於11月3日至11月4日假挪亞方舟舉行，是次活動的閉幕音樂會昨日（4日）晚上順利完成，大會今年為非洲的饑餓人口籌款，以「升溫的飢餓」作主題，更是首次舉辦低碳版「饑饉30」，藉此喚醒大眾對全球氣候變化及飢餓問題的關注，營內亦提供定向挑戰、單車發電挑戰及環保再生工作坊等多項低碳活動予營友體驗。
是夜的閉幕音樂會邀得唱作人岑寧兒、組合per se、說唱歌手Heyo及Triple G，以及獨立樂隊R.O.O.T擔任表演嘉賓，以歌聲為營友們打氣。眾歌手分別於台上獻唱，感謝營友們無私的付出，身體力行體驗飢餓。
組合per se打頭陣演出《竊竊詩》、《無窮》、《孤獨之塔》，以悠然的曲風為營友送來清爽感。per se於台上鼓勵營友們，又大讚現場氣氛很熱血，在獻唱《在生》之前，他們說：「呢首歌送畀在生嘅人，因為唯有你哋先仍然可以改變世界。」於台後受訪時，per se說：「我知道以前（饑饉30）成日有唔同藝人去探訪，感覺大家做緊一件實在嘅事。相信大家經過呢30個鐘之後，對日常有嘅嘢感受更深。我哋覺得營友們好犀利，通常大家係畀錢買享受，但係佢哋捐錢仲要入嚟捱餓，大家都好有心。」per se雖然未曾參加饑饉30，但亦曾捐款支持，期待以後有機會成為營友。
對於今年宣明會首辦「低碳版」饑饉30，per se亦分享他們的減碳體驗：「早排買機票嗰陣，發現原來有個捐款嘅選項，係抵消返碳排放，雖然搭飛機係唔環保，但係至少做返少少嘢補償。」又指愈來愈多人關心減碳，已經是很好的開始。另外，per se剛剛推出新歌《在我失去色彩之前多多指教》：「呢個係橫跨今年同明年嘅計劃，希望讓成年嘅我哋回望中學時代嘅遺憾，從中解開大家嘅心結，亦希望可以鼓勵中學生做自己享受嘅事。」
緊接下來，Triple G登場連唱《轆轆》、《自畫像》及《白日夢一場》等五首歌，他在台上感謝營友參與：「多謝大家出心出力，來做正確嘅事，希望大家保持呢個心行落去，因為香港需要咁樣嘅人。」輕快的曲式帶動營友齊齊站起來擺動身體，會上一片愉快氣氛。他透露哥哥小時候曾參與饑饉30，因此今日的演出感覺更奇妙：「見到大家都仲好有energy，好開心，今日都特別揀啲柔和啲嘅歌，就住大家嘅體力。」問到假如有改變世界的能力，Triple G期望改變甚麼？他希望全世界也可以使用相同的語言，讓人與人之間有更多溝通。Triple G又笑謂年初完成音樂會後都在休息中，最近終於充電完畢：「我要開Turbo啦，而家都keep住寫歌，計劃明年再出碟，今次想出正式專輯，目標8首入面已經寫咗4首，所以好有信心4、5月出到。」
R.O.O.T與Heyo為營友送上節奏感強勁的樂曲，其中R.O.O.T的《非洲的60秒》與今年大會為非洲飢餓人口籌款的目標不謀而合，以歌聲再次喚起大眾對飢餓問題的關注，他們說：「捱餓30個鐘仲可以數住，但非洲嘅人捱餓係唔知要捱幾耐。希望大家每日都諗起，世界有啲地方有啲人冇咁好彩，咁我哋比較好彩嘅，係咪可以出少少綿力去幫吓佢哋呢？捱餓同埋無瓦遮頭嘅難得體驗，希望大家記住呢種感受。」
他們受訪時指特別揀選《非洲的60秒》，希望大家明白非洲的生活條件雖然比香港差，但他們的心仍然很自由，R.O.O.T又認為饑饉30是非常好的體驗，因為肚餓與疲倦是很大的動力：「住喺香港嘅我哋好容易覺得係理所當然，非洲啲屋入面嘅地板係石頭，係即係『街』嗰啲石路，人哋係連生存都好困難。」問他們假如有改變世界的能力，R.O.O.T希望每個人都可以得到教育的機會，讓大家處於相同教育水平去討論、研究如何解決飢餓、貧窮等問題。他們又希望將來可以隨宣明會到訪非洲，親身感受當地的環境，與當地人接觸。至於R.O.O.T的工作大計，他們計劃半年內推出專輯：「會將我哋呢幾年嘅歌集合返，另外都會有啲驚喜畀大家，會有意想不到嘅crossover。」
Heyo的《同一天空下》、《歡迎嚟到呢座城市》及《On My Way》等為現場帶來無限活力，營友們紛紛揮動電話燈，場面熱鬧又感動。他在後台受訪時表示，期待將來可以以營友身份參與饑饉30：「唔會怕餓，成班人陪住，咁有儀式感，個力量都強啲。頭先見到大家都好犀利，仲好有 energy。」談到減碳生活，Heyo平日喜歡步行，小時候已經常由中上環走到北角：「往時都有玩啲毅行比賽，而平日用踩板代步。」工作方面，正製作新歌及MV，《夢謠》企劃進行中。
最後，岑寧兒（Yoyo）壓軸出場，送上四首輕柔寧靜的作品《You and I》、《無常家》、《水彩》及《剎那的烏托邦》，她表示所有與營友打氣的說話都放於歌中：「平時唱呢啲歌會好heavy，但係今日喺呢個環境下，相信大家都有唔同感受。」Yoyo中學時代曾與同學參與饑饉活動，笑謂當時年輕所以感覺不太辛苦：「我記得有好多活動玩，好多體力勞動。其實我係好驚肚餓，平時總有啲餅、飯團喺袋，結果唔係咁得人驚，係會手軟腳軟，但係餓嘅感覺會過，不過學生時報去體驗吓係好嘅。」
她鼓勵大家參與饑饉30，認為長大後會因為生活壓力或是種種原因影響：「當仲係學生，去呢啲活動嗰陣，你可以諗多啲你想要嘅生活方式，你嘅未來係點，所以真係好值得參與。」Yoyo透露稍後會到台北舉行演唱會：「我真係好期待，因為好耐冇見過台灣嘅朋友，同埋今年都努力寫歌，所以出年都係時候錄碟。」
最後，Yoyo、Heyo、Triple G及R.O.O.T聯同香港世界宣明會董事會主席陳朝光、香港世界宣明會營運總監張詠芬與營友齊齊倒數，宣佈今年的「饑饉30」正式圓滿結束！眾歌手期望大家離營後不忘這次的饑饉體驗及飢餓群體的需要，並於日常生活中實踐低碳生活，為保護環境出一分力，持續關注全球氣候變化及飢餓議題。
今年「饑饉30」籌得的善款將用於支持宣明會在非洲的工作，為受飢餓影響的兒童、家庭及社區提供糧食援助、醫療服務及水利設施。大會呼籲香港市民繼續透過網上捐款，支持有需要的弱勢社群，詳情請瀏覽：https://www.worldvision.org.hk/famine30
