小塵埃未開唱先被感動到喊 《INTERSTAGE 2023: STOPOVER w/ LIL’ PIECE OF ME》

小塵埃的Pollie與Jonathan日前參與由香港演藝學院舞台及製作藝術學院學生製作的流行音樂會《INTERSTAGE 2023: STOPOVER w/ LIL’ PIECE OF ME》，這次二人與一班學生一同製作音樂會，讓他們重拾求學時期做Show的快樂，但未開Show，眼淺的Pollie已被同學仔整喊。

《INTERSTAGE》系列已舉辦6年，過去學生們藉此夥拍具實力的歌手，共同探索科藝和音樂會製作的可能性，並在資深音樂會監製康家俊帶領下，製作出一場高水準的演出。今次小塵埃與一班學生用了5個月的時間籌備演出，他們的感到十分興奮，Pollie解釋道：「好耐冇試過咁樣由零開始去籌備，一步一步咁行，好似回到我哋細個搞Show嘅日子。我同Jonathan以前讀書都有學舞台製作，一齊去完成我哋畢業作品，所以同一班同學仔一齊玩呢個Show，Recall好多回憶。」

在今次的合作中，好多同學仔都對小塵埃不太認識，但想不到他們觸覺敏銳，第二次跟小塵埃見面，便搞喊Pollie。Pollie道：「同學仔都係第一次見面時先知今次合作嘅單位係我哋，開始時大家對我哋嘅認識好少，於是我哋同大家分享心路歷程，但估唔到第二次見面，大家已經好有想法，仲將想法結合Design同Execution上面。聽完佢哋嘅Presentation（匯報），有一句好打動到我：佢哋話小塵埃可以成日用音樂鼓勵到其他人，但我哋總會忽略，自己係最需要被鼓勵嘅人。聽到真係超級感動，我仲唔小心喊咗！經過呢次開會，雙方都打開咗個心去籌備呢個演出。」

這班演藝學生，特別揀選了小塵埃的15首作品，與Pollie及Jonathan一同探索，學會珍惜自己仍然想做的，向不重要的瑣事講聲拜拜。在演繹作品時，Pollie與Jonathan都分外雀躍，Pollie解釋道：「今次樂手中有4位來自Music School，負責吹奏銅管樂，佢哋係純Classical人，第一次玩流行曲，佢哋好興奮，我哋亦一樣，因為我哋一直好想有真嘅管樂去參與我哋音樂Live演出，今次〈慢活〉、〈飛吧！獨角仙〉都可以有真嘅管樂演奏，好開心！」除了舊歌以外，今次小塵埃亦在音樂會中首次獻唱新歌〈拼命優雅〉。在資訊世界好多人吹奏美好、風光一面時，其實很多人仍努力掙扎中，Pollie與Jonathan透過新歌希望分享他們對這個現象的想法，同時如何面對資訊爆炸的世界。

經過這次《INTERSTAGE 2023: STOPOVER w/LIL’ PIECE OF ME》的演出，小塵埃很感恩能參與其中，Pollie道：「音樂盛載我哋好多想講嘅說話同想法，希望會成為一份祝福，陪伴到呢班同學。經過今次製作，我哋嘅歌曲成為佢哋嘅回憶，呢次嘅合作，可以成為佢哋成長嘅一啲片段，就覺得自己做緊嘅嘢，係好有意義呢！」