阿正為港鐵「搞笑」車廂廣播 參觀車廠試駕列車「倒瀉籮蟹」

商台DJ黃正宜（阿正）早前為港鐵拍攝短片，佢仲走訪鐵路各大崗位，阿正表現興奮成個「大細路」，特別對車廂廣播系統有興趣，即席示範「搞笑」提示，仲笑言計劃「買車」自駕遊：「睇完啲列車都想買翻部自己揸，因為設備都好齊全啦，冷氣夠之餘仲有廣播系統，襯晒我嘅行業囉！今日第一次嚟列車廠，我好似小學生去學校旅行咁，加上我喺一個好學嘅女人，無時無刻都有大把問題去問，比我試吓啲平時冇機會掂到嘅設備。」

阿正就話自己冇車牌，坦言車長太多事兼顧，自己冇能力控制列車：「頭先同事介紹比我聽啲細節，不過我喺聽唔明嘅，所以都係坐車算啦。今次聽咗好多同事嘅故事，唔同崗位都好投入，學識咗只要堅持，遇到機遇就會有好成績，呢啲故事好鼓勵到我自己。依家自己管理Café，都會覺得好忙好複雜，但呢日相比先發現原來好簡單，人地責任大好多！」

除咗參觀之外，阿正仲要穿上制服走入模擬駕駛室試駕唔同列車，不過佢就「錯重點」，著眼制服嘅剪裁：「我想講呢套制服好難著，身型有翻咁上下先Carry到件衫，好似維修部係綠色嘅，平時係好難襯，條腰又要瘦先好睇，但呢度啲同事佢地又著得好好睇，啲專業味逼晒出嚟。」

阿正拍攝一連五集節目，訪問了港鐵不同背景同崗位嘅員工，佢哋透過公司提供嘅唔同培訓計劃，同埋在職訓練同外地交流經驗, 都揾到專屬佢地嘅職業旅程，連阿正都話想喺港鐵做！節目將於10月20 日起於港鐵YouTube頻道播出。