何展睿應付考試 推遲慶祝結婚周年紀念

唱作歌手何展睿（Steve）今年與太太結婚五年，上年正日他特別為太太親調香水及訂酒店睇日出，但今年正日竟然無大肆慶祝：「之前為搖滾歌拍MV學打鼓，自己一向講到做到，所以苦練打鼓仲考埋試，但竟然掛住練鼓唔記得結婚五周年。練緊鼓個陣，老婆突然拎住蛋糕入房比個驚喜我。我就無特別預備，只係當晚食大餐，不過之後會補數，好彩佢大人有大量無嬲我！」

Steve為考試廢寢忘餐，直言學打鼓有箇中原因：「自細學古典音樂，感覺好斯文，但其實我內心有團火，想發揮動感一面，所以唱搖滾歌外，仲身體力行學打鼓。記得錄影考試當日好興奮，但發生蝦碌事件，打到第三首歌就擺錯譜，要中斷重錄。今次真係可以再次體驗以前考試既緊張，所以好欣賞年紀細細淡定去考試既小朋友！」

講到結婚五周年紀念，中國俗稱「木婚」，意指夫妻關係像幼苗長成樹，寓意不斷成長。他指今年兩隻愛犬離世，感激太太身邊安慰並悉心安排旅行散心。考試完成後就策劃一連串慶祝補數：「近期去咗太多旅行，今次就留港慶祝。老婆鍾意蠟筆小新，所以訂咗間用呢個卡通為題既酒店，靜靜地一齊放鬆兼睇日落。而今年係木婚，自己費盡心思諗禮物，最後決定訂造一個有我哋合照既首飾音樂盒比佢，又實用又有紀念價值，希望補獲成功啦！」

最後，Steve表示年頭作曲送給太太的新歌《心跳》登上流行榜前三甲位置，得到好成績，除了為他創作打了強心針外，更分享音樂大計：「一向做音樂都無唸成績，多謝大家支持，可能情歌容易受落，所以構思日後可能每年都出首情歌跟歌迷分享順便冧老婆！」