徐小明推動香港武術電影繼續發揚光大

中國香港武術聯會(簡稱: 武聯) 成立至今已 36 年， 由霍震寰會長帶領下積極傳承與弘揚中華文化，推動武術國際化…
日前舉行慶祝中華人民共和國成立七十四周年暨第十七屆執行委員會就職典禮；出席藝人包括馬浚偉、楊盼盼、林迪安、敖嘉年及劉家榮師傅等。

而徐小明則以武聯副會長身份招待嘉賓及在壓軸環節獻唱「男兒當自強」，並由中國香港武術代表隊表演多項真功夫。
馬浚偉表示: 「喺TVB多年，功夫全部都係由多代武術指導教出嚟，自己只係基本認識，絕對唔係專業，拍戲擺兩下招式仲可以呃到人。不過除咗電視劇我曾於小明哥執導嘅《 建元風雲 》中飾演和尚嘅角色，同胡軍、佘詩曼等拍檔，當中有啲打嘅場面，係小明哥親自教 。講到振興香港電視工業，可考慮拍攝古裝劇因為香港演員對古裝拿捏度高，根基紮實。 」

身為副會長的徐小明表示正努力將中國武術推向國際，亦正草擬計劃，打算向香港政府爭取將武術加入學校課程：「好多地方包括韓國、日本都將自己嘅國技加入課程，由幼稚園已經畀佢哋接觸空手道、柔道、跆拳道都發展得咁成功，我哋傳統嘅武術文化都可以成為運動課程。」他表示同時會建議政府撥出荒廢地給武術界建立中國武術資料庫，將一班武術前輩的門派心法及拳經劍訣，以文字將之保存，傳承後世：「我哋亦會搵演藝界拍武俠片嘅演員同武術指導幫手，喺文字以外用短片形式，去介紹武術前輩嘅故事。致力宣揚武術喺最重要，有需要我支持嘅地方，我一定带頭親自指導。」

敖嘉年表示近排忙於籌備自己的音樂劇作品，會包辦作曲填詞，「對於國術我一向好支持，不過小朋友可能覺得練功夫好辛苦，可以諗一啲有趣嘅方法提高佢地學習興趣。另外我當然希望香港嘅武術電影可以繼續發揚光大，用得着我嘅地方我一定支持。」

香港著名武術指導林迪安（Dion）是徐小明的嫡傳弟子，當然到場支持師傅， Dion表示知道梁朝偉獲頒威尼斯影展「終身成就金獅獎」: 「佢攞到呢個獎，真係好戥佢開心同埋有啲激動，香港電影能夠衝出亞洲，簡直係華人之光! 我好感恩，喺我演藝生涯8次奪得兩大頒獎典禮「最佳動作指導」，能夠有今日嘅成就當然要多謝我師父小明哥，所以我一定身體力行去支持佢推動香港武術電影。」