釗峰出道14年終於成立個人FC 雲浩影,李嘉俊與逾百「峰心粉」大合唱生日歌

明天（31日）是梁釗峰生日，唱片公司「寰亞音樂」日前在荃新天地舉辦「Citywalk X 梁釗峰 Summer Hang-out」活動替他慶祝，全場逾百「峰心粉」（釗峰歌迷暱稱）大合唱生日歌和送上蛋糕。並隆重宣布，釗峰的個人歌迷會「峰心學院」正式成立，讓他今年生日別具意義，喜上加喜！釗峰更邀請同門小師妹雲浩影（Cloud）和「造星V」學員李嘉俊（Carson）出席唱歌表演，及與現場Fans玩遊戲，大派禮物和合照留念。

 

釗峰出道14年，過往以C AllStar團迷為主，他單飛發展兩年，終於成立個人歌迷會，笑言要向Cloud和Carson兩位「請教」，他說：「我個人歌迷會今日成立，呢方面好green，想請教兩位同Fans喺歌迷會交流嘅心得。你哋會同Fans分享啲咩？」Cloud透露會與Fans交流打機心得，說：「我會同大家聯誼吓，分享Fans獨有嘅福利，TG Group好似一個小天地，可以盡情做一個好開心嘅自己。」釗峰認同：「係，可以乜都傾，因為佢哋好愛我哋，可以好放，佢哋反應亦好直接。」身旁的Carson對釗峰說：「其實我FC都係剛成立，早你少少，但無你咁大範模。因為Fans鍾意聽我哋唱歌，有時會錄幾句歌分享，亦會分享私相簿。（你同女友啲相？）冇咁私密，只係同朋友一啲有趣嘅生活照。」

對於歌迷會取名「峰心學院」，釗峰解說：「我諗咗好耐叫咩名，除咗『國際國迷會』咁官方嘅名之外，我就諗到叫『峰心學院』，因為我啲Fans叫『峰心粉』，我想成立一個『學院』，佢哋平時叫我『教授』，希望佢哋好似入到大學有唔同『社』，我興趣好多，鍾意跑山、身心靈嘅、禪座、Board Game（棋盤遊戲）⋯⋯希望有唔同嘅『社』畀佢哋參與。」提到集體遊戲，Cloud興奮地提議玩「狼人殺」和「劇本殺」等真人角色扮演遊戲，釗峰立即邀約他們一齊玩。他又搞笑玩食字，說：「我呢個『峰心學院』又名『峰心禪院』，希望大家接收我嘅訊息，即係『收風』，亦可獎『修心』！」

活動上，釗峰演唱兩首新歌《已⋯⋯（3235）》和《愛情難以許何我們回到當初（1717） 》，Cloud亦演唱新歌《無以名狀的痛》，而Carson表演張敬軒作品《隱形遊樂場》，完場後異口同聲表示未夠喉，希望一齊開音樂會，以不同配搭形式合唱。Carson表示剛才在台上緊張到手震，Cloud安慰他說：「你表現得好好，其實我都學習緊，上台仍然會好緊張。」釗峰鼓勵他們說：「你哋控場好好。我嘅緊張好視乎台下觀眾係邊一類，如果係自己友，我就會輕鬆啲，甚至特別放。如果台下觀眾未認識我，或者撓埋手睇吓我唱成點先，我就會有『無以名狀嘅壓力』。」