吳大強首度演繹廣告歌 提醒三高人士了解腎病風險

香港健康資訊平台康心摯友和慢性腎病患者自助組織聯會腎友聯今年繼續推出聆聽「腎」訴（ #ListentoYourKidney ）推廣計劃，邀請在「中年好聲音」中一唱成名的參賽者吳大強（Bill哥哥）首度演繹廣告歌「聆聽腎訴」，並少有以攪笑、鬼馬台風演出廣告片及MV，以歌聲提醒大家一起正視腎臟發出的警告及定期接受檢測的重要性。

Bill哥哥在拍攝現場精神抖擻地大展歌喉及舞步，大呼拍攝輕鬆又好玩：「今次拍攝係我要被醫生評審叮我無聆聽『腎』聲音，正視腎病風險！唱歌我絕對有信心，但腎病風險都係睇今次嘅歌詞先知，原來初期慢性腎病病徵好容易被忽略，要留意蛋白尿、水腫，腹痛都可以係病徵1！好在我前排休息都驗清楚曬無問題，咁先可以放心出嚟同大家見面唱歌！」

Bill哥哥更識做地說：「今次我首歌都有唱，『腎病最多隱性症狀』，如攪到腎臟壓迫就真係十分懊惱。唔講唔知同腎病相關嘅疾病係香港人嘅頭6號死亡殺手2，所以大家尤其『三高』嘅朋友真係要定期接受尿液檢測，Check 真啲就家人同自己都放心喇！」Bill哥哥最後更盞鬼地提醒大家：「怕自己唔記得咩係慢性腎病，或者慢性腎病有咩隱性症狀，聽多幾次我依首《聆聽腎訴》就會一清二楚架喇！最好Share 埋比身邊好友聽，齊齊正視慢性腎病風險，一齊『聆聽腎訴』！」

聆聽「腎」聲音的宣傳片已於今日正式在康心摯友以及腎友聯社交平台同步推出。而為活動特別錄製的MV亦將於7月31日面世，大家萬勿錯過。

康心摯友誠邀大眾了解更多有關免費腎病檢測資訊，並鼓勵各位 ─ 尤其是「三高」人士主動向家庭醫生了解個人風險。因為只有及早檢查，才能預防末期腎衰竭或因患上慢性腎病而影響日後的生活質素3。

注：三高 = 高血壓，高血糖 (糖尿病)，高膽固醇。