RubberBand洛杉磯演出感覺夢幻《RubberBand Ciao World Tour 2023 – 美加站》

繼香港、英國倫敦及曼徹斯特、德國柏林、荷蘭阿姆斯特丹及台灣台北後，RubberBand在過去周末於美國洛杉磯展開他們《RubberBand Ciao World Tour 2023 – 美加站》之旅，而這一場剛好是Ciao Tour的第10場。主音6號首次踏足當地，面對熱情的樂迷，都難忍男兒淚，一度眼濕濕。

首度於洛杉磯開唱的RubberBand，於演唱會開首便以〈Dedicated To…〉、〈¿醒未?〉及〈細街盃〉與樂迷熱身，隨後6號興奮跟樂迷分享道：「好開心嚟到LA，好難得第一次喺美國有我哋嘅專場，第一次踏足呢個地方，好多謝咁多人嚟見證我哋北美洲嘅第一次！這刻我們在一起，希望我哋嘅音樂可以同大家打打氣，擁抱一下。」打過招呼後，RubberBand便唱出製作中的第10張專輯《Juntos》內的作品〈戀人日常（的直線抽擊）〉、〈宇宙大王〉及經典歌曲〈小涼伴〉、〈阿波羅〉等新舊作品，之後 6號又再分享身處加州的感覺，說：「過去一直只係睇荷里活製作嘅電影、聽歌去幻想呢度係點樣，而家加州喺我眼前，感覺係好似電影咁夢幻。呢度係我哋暫時去得最遠嘅一個城市，係好感動嘅一件事，所以我哋會盡量諗辦法嚟多啲，不過好唔慣日夜溫差好大，有少少攝親，好廢，係最廢嘅主音！」6號又以英文跟外國人觀眾打招呼，但卻被結他手阿正要求說回廣東話比較好，結果惹來全場大笑。

6號向來感性，這次首度在加州開Show，但他卻覺得似是最後一次，他說：「我哋叫Ciao Tour，就好似每次同大家Say hello，但完咗亦會同大家講再見，唔知幾時再見面，所以呢個Ciao Tour係別具意義，同你哋第一次見面，亦都真係可能係最後一次，所以份外珍惜。」可能由於份外珍惜這次在當地演出的機會，6號訴說了很多創作鎖事，例如為電影《掃毒》而創作的歌曲〈心照一生〉，6號分享道：「當中有一句：有一天趕上壯麗落霞，當時係諗住大峽谷，一班麻甩佬揸住架車但冇油，落車攞酒出嚟飲嘅畫面去寫，今次未必有時間去到大峽谷，但可以喺鄰近嘅LA唱呢首歌都幾有Feel。」

為了今次北美站的樂迷，RubberBand特別送上盧冠廷〈陪著你走〉，樂隊在2011年曾翻唱此曲，6號透露當年與填詞人Tim Lui結婚，隊友們與鍵琴手雷柏熹都有在婚宴中獻唱此曲，為一對新人送上驚喜。6號又提到與太太多年來為RubberBand寫詞，但甚少為樂隊寫情歌是有原因，他說：「我哋入行時都差不多30歲，寫情歌的確有啲困難，同埋我哋都好相信細水長流嘅愛情觀，會係更加難得，如果仔啲嗰陣或者會寫啲苦海求生、做兵嘅歌。」

在演唱會尾聲，RubberBand兩度Encore，唱到〈逆流之歌〉、〈發現號〉時更走到台下與樂迷作零距離接觸，之後在唱出演唱會主題曲〈Ciao〉時，6號又再被樂迷的熱情所感動，哽咽道：「Ciao Tour不斷講散聚，好神奇嘅一樣嘢係，我哋不斷唱俾第一次見面嘅朋友，但每次見到你哋識唱我哋新歌舊歌，都好感動。我見到啲好開心喺度聽，有啲喺度流眼淚，我都被呢啲畫面所感動，我哋會永遠記住。」然後在唱過〈遊車河〉及〈Easy〉後，演唱會亦圓滿結束，而樂隊亦將移師至加拿大多倫多（7月26日）及溫哥華（7月29日），繼續進行美加站的演出，更多詳情，請瀏覽RubberBand社交平台專頁。