黃妍勇奪叱咤女歌手銀獎 林奕匡再捧唱作人獎 Phil作曲姜濤《Dear My Friend,》票選「我最喜愛的歌曲」《2021年度叱咤樂壇流行榜頒獎典禮》
《2021年度叱咤樂壇流行榜頒獎典禮》日前在亞洲博覽館舉行，Sony Music旗下歌手陳柏宇（Jason）、林奕匡（Phil）、小塵埃、黃妍（Cath）、Michael C 均盛裝出席這個年度盛會。結果 Cath 和 Phil先拔頭籌，合共捧走 3個獎，有個好開始。
Cath得獎大感意外
Cath憑着《天光前》、《無聲浪》及冠軍歌《我心中尚未崩壞的部分》等作品，獲頒叱咤女歌手銀獎，Cath在台上哽咽着向各單位致謝，又特別點名感謝去年推出的專輯《九道痕跡》的製作團隊。Cath坦言對獲獎感意外，就算大會在正式宣佈賽果前，已由主持在台上「暗示」，但她仍不感相信是自己，她說：「上到台我真係一片空白！唔知應該講咩好，真係好激動、好感動！所以落到台，我見到任何同事我都即刻攬住佢同埋即刻喊。我真係覺得呢個獎如果無咗啲同事嘅話，係無可能有。我覺得個獎係屬於我哋成個團隊，而唔係淨係屬於我一個，我只係出嚟present嗰個，但係如果無成個團隊嘅任何一個人，係唔能夠成事。」
Cath難忘同事積極地為她圓夢，她更封幕後團隊是「全宇宙最好嘅團隊」，她說：「佢哋好信任我，就算我講咗啲幾無稽嘅諗法，或者宣傳計劃，佢哋都肯一齊熱血地去做，呢個係好感動。」問到得獎後會否感到壓力倍增？Cath笑言：「我暫時未感受到，未消化到我真係攞咗個銀獎，我覺得真係好夢幻呀！」
Phil珍惜得來不易的機會
至於Phil比小師妹多捧一獎，他分別獲得叱咤樂壇唱作人銅獎，及他創作的歌曲《Dear My Friend,》獲得「我最喜愛的歌曲」。對Phil來說，創作人銅獎的意義重大，因為是他時隔3年再獲此獎：「一直以嚟我都係以音樂行先，同着重以音樂去代表我嘅事業，所以終於可以上返呢個台攞呢個獎，得來不易，既開心又緊張，因為知道上去嘅機會唔多，而且叱咤嘅獎有代表性。」他更提到自己對創作的堅持：「我覺得創作好重要，我好堅持要唱自己寫嘅歌，但有一刻我覺得自己好似去到樽頸位，所以嗰時做咗個決定要去美國進修，嗰陣時好擔心離開香港，大家會唔會忘記咗我⋯⋯」事實證明他的努力都被樂迷看到了。
Phil在台上講感言時，提到自己仍然很有火，他續道：「雖然我入咗行都11年，我依然好enjoy每次上台，去做一首好嘅歌、去唱一首好嘅歌，it never gets old！我好有火，因為每次做每一件事都歇盡所能。」他不諱言近兩年成長不少，學識除了製作出好音樂以外，還有其他配套以令自己的音樂可以接觸到更多層面的聽眾。另一方面，他睇準現時市場雖然競爭大，但亦代表多了很多可能性，他分析指：「多咗人去留意香港嘅音樂，this is a great time，可以做多好多類型嘅都得，同埋大家開始接受緊更多唔同類型嘅歌，所以話嗰種火伸延到想同唔同嘅歌手們合作。」
着重歌曲能感動人心
講到合作，由Phil作曲、男歌手姜濤主唱的《Dear My Friend,》昨晚獲票選為「我最喜愛的歌曲」，身為作曲人的Phil上台領獎時，讚揚姜濤演繹得很好，原來這個合作有段故：「呢首係第二首歌作俾阿姜，我記得第一次寫歌俾佢嘅時候（《孤獨病》），監製Edward Chan同我講，話阿姜好細個，叫我唔好俾太deep或成熟嘅題材俾佢，去到第二年嘅時候，我睇到佢嘅成長，睇佢IG知道佢有啲經歷、有好多唔開心嘅嘢，所以我覺得可以寫一首deep少少嘅歌。我記得我寫時第一個感覺係『呢首歌一定會令到好多人喊』，但我唔知道佢會唔會鍾意。佢聽完第二日就覆咗話鍾意，同埋send咗一段字俾我，話佢係想紀念佢嘅朋友，聽完佢嘅故事，我覺得要俾多少少空間佢，寫多少少backstory。」
對於歌曲得獎，Phil坦言同樣開心：「It’s different，但係都好開心，因為『我最喜愛的歌曲』每年得一首，一年有幾百、成千首歌，得一首歌攞到！」Phil更藉今次得獎，印證其作曲指標：「我做音樂嘅指標係有兩樣嘢，一個係令人開心，同埋touch people’s hearts，而家我作嘅曲真係感動到好多人嘅心，咁咪好囉！我覺得就算唔係我唱，但隻歌我都有份去做，而我做緊嘅嘢係真係it means something in this world，咁就已經足夠。」
得獎後繼續前進不停步
剛獲獎的Cath和Phil，即晚與唱片公司同事慶功後，Phil一返家便在社交平台開Live分享得獎喜悅，亦趁機答謝粉絲支持；Cath則與同事暢飲，她笑言自己應該會興奮到失眠。而兩位歌手並未因獲嘉許而稍作休息，反而已為將來計劃，Cath說：「已經預定檔期寫歌，我真係好感謝各位同行嘅所有人，因為除咗團隊之外仲有啲粉絲朋友同屋企人，而我唯一可以報答到佢哋嘅嘢，就只能係做好音樂，所以已預時間寫歌。我完咗頒獎禮都有同Phil傾偈，佢都係話想寫歌，我都覺得係應該攞住呢份情緒去寫一首歌。」Cath更希望挑戰不同類型的歌，也會努力突破自己的框架，看看自己可以嘗試幾多不同種類的音樂。
至於Phil就表示再找其他歌手合作，「我覺得音樂嘅行業裏面，好多時係大家去dream下、傾下就會發生，我唔係一個好識social嘅人，難啲去接觸同帶出新合作機會，所以今年除咗作多啲歌，都要的起心肝去傾合作，想合作嘅人即管去問佢，或者send多啲demo出去，音樂主動啲係好事嚟。」他坦言未有特定想合作的目標歌手或音樂類型，但已經十分期待。
