電影《12日》主題曲〈何日不再來〉 鄧麗欣Stephy 唱出面對沉悶婚姻感受 延續《12夜》整體概念

由本地製作有限公司出品及製作、伍健雄監製、林愛華執導的電影《12日》，是20年前經典電影《12夜》的概念延續，用12日道出10年夫妻關係，電影亦將在明年2月17日上映。既然是概念延續，當然要貫徹到底，所以《12日》的主題曲特別找來女主角鄧麗欣（Stephy）主唱，並由〈黑夜不再來〉的幕後主腦陳輝陽再次操刀，為電影譜製歌曲〈何日不再來〉。

 

以〈何日不再來〉作為歌名，Stephy表示這是製作團隊之間的共識，她說：「大家都知道成件事係概念延續，所以填詞以至整個製作團隊都覺得歌名都應該有返呢種感覺，好似延續版咁，呢個想法好好玩，好啱主題。」歌詞內容上，則道出了女主角Jeannie的內心世界，筆觸細膩。「呢首歌係好無奈，嗰種無奈係好想講出嚟，但又唔敢講、唔想講，就好似女主角咁，同男主角之間嘅關係，喺度爭持、角力，但同時間內心又好矛盾嘅心情，喺〈何日不再來〉唱返俾大家聽。」Stephy表示自己向來很期待唱電影主題曲，因為與平時演繹流行曲的感覺很不同，她說：「拍完《12日》好有畫面，唱主題曲嘅過程就好似俾我重新再演一次，係另一種好玩，同唱流行曲好唔一樣。」

Stephy過去曾數度與陳輝陽合作，最為人熟悉的是〈他不准我哭〉，二人相隔14年再次合作，她自言十分期待，說：「一直好期待佢嘅曲，收到後完全冇失望，正！一來好啱套戲，二來令我好感動，所以好開心可以撮合到同佢再度合作，出嚟所有嘢都好滿意。」再度合作，Stephy坦言陳輝陽與過去一樣嚴謹，但指導上跟過去卻有不同，她說：「因為係電影主題曲，輝陽會對我嘅唱法，以至點樣透過歌曲營造畫面等等嘅要求都多好多，不過我同佢同一個星座，所以比較明白佢，用咗唔係好長時間就錄起首歌。」