慶祝成軍3周年 《MIRROR Be 3 Birthday Party》MIRROR首唱新歌〈All In One〉

為答謝沿途陪伴成長的記者朋友、不離不棄的鏡粉及是次贊助麥當勞客戶，MIRROR特意在昨日成軍3周年的日子，分別舉辦傳媒+友好場、客戶場及鏡粉場合共三場的專屬答謝會《MIRROR Be 3 Birthday Party》。昨日答謝會上，MIRROR十二子除分享了3 年來的難忘經歷與感受、與現場鏡粉大玩遊戲外，他們更首度公開新歌〈All In One〉MV並作首次公開獻唱。

今次Birthday Party可謂別出心裁，每位入場的鏡粉，一進場便可獲得禮品包，當中包括MIRROR BE3 生日卡、Pom Pom 棒以及其中一款印有MIRROR成員自畫像的汽球，而驚喜更是源源不絕，因為場館內特別設置了展覽區，展示了與MIRROR有關的物品，當中包括入行以來獲得的重要獎項獎座、電視劇劇照及道具、演唱會紀念品、12位成員的中學學生相及各人的Fans應援燈牌，每一件展品都紀錄了MIRROR的成長點滴與入行後的難忘經歷，對於MIRROR來說，都是格外珍貴。

而昨日活動一開始，大會先播放MIRROR為慶祝成軍3周年而推出的新歌〈All In One〉MV，接著12位成員隨即登場，並作自我介紹道：「大家好，我哋係MIRROR！」Lokman更以隊長身分道；「每一次講呢一句都好有成就感同親切感，我哋成日自己介紹時，台下嘅朋友都會一齊大嗌，呢一個迴響係好正！」昨日正好是MIRROR的生日，各成員都分別分享感受：

隊長Lokman：「多謝大家支持，除咗我哋力量係唔夠，仲要集合晒身邊台前幕後，包括埋台下嘅你哋先得嘅！多謝大家。」
副隊長AK：「由比賽到而家呢3年走嚟都唔容易，多謝大家嘅陪伴、支持同埋包容，去令到我哋進步。」
Frankie：「大家俾我哋嘅力量，我哋全部收到晒，好多謝沿途有你。」
Jer：「呢3年好快就過咗，我哋應承大家，會繼續努力做更多作品俾大家。」
Alton：「好多謝大家一直以嚟無私嘅支持，我哋完全感受到你哋俾我哋嘅力量，希望每一年生日都見到你哋。」
Tiger：「3年嚟好多謝一路以嚟陪我哋走過嘅人，多謝11位兄弟，多謝大家一路以嚟對我哋嘅支持，祝大家年年有今日。」
Edan：「多謝大家嘅支持，冇大家嘅支持，都開唔成呢個生日會，希望大家可以陪我哋過更多嘅3年。」
Anson Lo：「過得好快，好特別，由出道開始每一年生日都多咗好多人同我哋過，有你哋一齊，我哋承諾會用我哋200%嘅努力去做好每一份工作。」
Stanley：「除咗多謝我哋嘅兄弟同埋幕後團隊，其實好多謝咁多客戶對我哋嘅支持，多謝記者朋友，全靠大家支持，先有我哋MIRROR。」
Ian：「多謝大家冇離棄過我哋。」
姜濤：「多謝大家，我哋以後一定會盡全力。」
Jeremy：「多謝大家陪住我哋度過3周年，希望以後仲有4周年、5周年、6周年同大家一齊過。」

接著MIRROR與眾同樂，在台上大玩大電視遊戲「做緊乜嘢Relfection」，並分了「王勁隊」及「好勁隊」對戰，向來一玩遊戲便變了大細路的MIRROR，都忘我地展露出搞笑的一面，感染了一眾鏡粉，歡笑聲此起彼落，貫穿全場，而最後由Lokman、AK、 Alton、 Frankie、Tiger及Jer組成的「王勁隊」贏出了比賽。既然是生日派對，當然少不了切蛋糕的環節，Lokman趁機代表MIRROR講出生日願望，說：「第一個願望係身體健康，第二個願望係大家可以快啲去旅行，第三個願望係希望出年可以再見到大家。最後一件事，係想講返〈All In One〉係承接〈One And All〉嘅，〈One And All〉係循住我哋出發，〈All In One〉係集合住大家嘅力量。同埋今日生日，除咗係我哋嘅開心日子，亦都係爸爸媽媽辛苦嘅日子，所以今次想藉住呢個機會，再多謝返我哋嘅爸爸媽媽：魯生、金生、花姐、寶姐同埋《全民造星》呢個節目，多謝大家。」而現場鏡粉都誠心為MIRROR大唱生日歌慶祝，眾成員看在眼裡，都份外感動。在切過蛋糕過後，MIRROR即為現場鏡粉演繹新歌〈All In One〉，能夠在現場率先聽到新歌首唱，鏡粉們當然感到驚喜萬分，不過壓軸驚喜，是每位鏡粉都可以跟MIRROR合照，人人都盡興而歸。