《#PTGF出租女友》張沛樂真飲酒撩趙善恆

張沛樂（沙律）在導演鄭峰嵐執導新片《#PTGF出租女友》中飾演一名ptgf，其實這是她二次扮ptgf，早於三年前沙律已拍過話題劇《向西聞記》單元《PTGF&PTBF》，笑言自己都算係ptgf「始祖」，雖然角色職業相同，但性格有異，《向西》角色較中性柔和，電影《#PTGF》的角色就巴渣、剛烈，更屬一個隱藏角色。

電影中有場戲講述沙律同恆仔邊飲酒邊傾偈，沙律在現場亦飲真酒，「劇組有問拍呢場戲少少哋飲啤酒係咪ok，我話冇問題，入戲啲，飲酒同飲茶唔同feel，啤酒唔會咁易醉，我都飲得嘅。」沙律稱她平日飲酒會睇心情，跟朋友開心飲酒relax當然好，如果出席活動就不會飲太多，「揸杯酒做樣，唔會俾自己控制唔到嘅情況出現。」

拍飲酒這幕戲後，沙律緊接拍攝的是一場「動作戲」，她打得似模似樣，亦相當兇狠，她笑說：「見到我有啲身手係咪？我好開心自己有身手，我一直期待自己有動作場面，剪片後睇落感覺好型，一定冇專業咁勁，但有少少動作戲都開心。」沙律以前有打拳，又玩過武術堂，今次正好大派用場，因她要擸煙灰缸擊向一位男演員對手，劇組特別帶來三個膠製的煙灰缸給沙律「打人」，豈料她連續打爛兩個，到剩最後一個道具時，劇組人員提她再打爛就要用真煙灰缸，沙律說：「對手係呆咗望住我，好驚，話『你唔好呀！』但最後佢冇受傷，我又冇撞瘀嘅。」

沙律和恆仔在片內不乏對手戲，兩人以往曾合作拍網片，相隔幾年在電影碰頭，沙律形容大家感覺都初心，沒有太大轉變，未知恆仔對沙律的演出有沒有評價？她表示恆仔讚她有進步，但她覺得仍有很大進步空間，始終自己演戲經驗不多，只是學行階段；而她覺得恆仔因早前拍《一秒拳王》操fit，人瘦了而且「乾身好多」；至於兩人在片內的關係，沙律打趣：「我哋好親密但冇親熱關係，講太多唔好啦，入場睇啦。」
港產話題片《#PTGF出租女友》由導演鄭峰嵐執導及編劇，監製周顯、舒小獨，出品人梅偉琛、吳文俊、鍾培生、舒小獨，出品公司為UPTV娛樂、中國創意數碼娛樂及香港電子競技有限公司。電影將於9月22日正式上映。