倪辰Lala 轉行做財經主播 獻計熱炒『姜幣』投資

虛擬貨幣商店Coingaroo隆重開幕，特意邀請倪辰 Lala、楊芷羚stella（造美人冠軍）、張育玲 Kathy （造美人最後十強）、歐陽玉婷 Miko （造美人最後十強）、劉兆汶AB（造美人最後十強）參與剪綵儀式，而Lala更變身做「財經主播」，將與網民分析虛擬貨幣走勢：「自己都瞓身入市，投資咗大概六位數，係我全部嘅積蓄嚟㗎喇！之前做演唱會、商演，一蚊一蚊咁儲埋，真係有血有汗，但係做歌手收入太過唔穩定，所以要投票增加自己嘅收入，加上呢個客戶邀請我做直播主持，聽咗好多專家意見，有信心先敢入市去馬，如果蝕錢第時嫁妝都冇埋㗎喇。」

由歌手踩過界做財經主播，Lala坦言壓力甚大，記熟相關產品資料最考功夫：「人地問你唔可以吓吓上網搵資料，咁太過唔專業，而人地財經節目臨尾個段『急口令』，真係好難！比啲時間我，我會表現到專業嘅一面比大家睇。其實我預計虛擬貨幣都有上升嘅空間，如果MIRROR第日推出認證『姜幣』，佢地咁受女性歡迎，應該大有市場，甚至規定搵佢地拍廣告，用『姜幣』找數，應該會顛覆成個娛樂圈！」