許嘉浩教尹蓁晞、麥貝夷整巨型漢堡

疫情期間好多人都變成「疫境廚神」,加上夏天最近連日落雨,有時都會喺屋企化身廚神炮製美食。日前著名形象指導許嘉浩(Karl Hui)相約兩女尹蓁晞(Yumi)同麥貝夷(Karene)喺觀塘新開西式廚房一齊炮製巨型漢堡,大家都笑笑口話個巨型漢堡真係大過自己個頭。一向鍾意整嘢食嘅Karl喺宜家正藉暑假嘅時候都好懷念以前讀書時期每逢暑假都被屋企人安排出國去Summer Trip:「一開始當然想留喺香港同同學仔放暑假一齊出去玩。之後一年接一年都接住去暑假遊學團,發現果一個幾月Student Trip飛去唔同地方體驗係好好玩,眼界大開。」

Karl憶述之前Summer Trip仲要Home Stay寄居喺當地人家庭裏面。喺澳洲、英國、美國之行間屋仲好大好靚。除咗學到英文之外,仲學識西式廚藝:「記得喺美國紐約果次Summer Trip, Home Stay Family嘅爸爸喺好有經驗嘅酒店大廚,放假喺屋企就會教小朋友整漢堡包、薯蓉、蛋糕等等西式美食。所以細細個已經識整美式巨型漢堡包,連當地人同大廚食過都讚好味,仲識過用港式乾炒牛河嘅瑞士汁炒牛肉放入巨型漢堡當中,食到佢哋好驚喜。」

而適逢當日觀塘西式廚房正正喺當年大名娛樂旁邊,昔日曾為同公司藝人嘅尹蓁晞(Yumi)同麥貝夷(Karene)指離開公司後好長時間無見過面。幾年後重遇的兩女指大家相約Karl試食重聚,指大家都成熟咗唔少,仲講起以前出Show的往事。

Yumi話自己成日宅喺屋企同貓貓相處同鑽研新菜式:「西式菜自己一向鍾意食,有時夜晚唔想食咁多飯或麵、碳水化合物。可能輕盈啲食個包或者三文治,甚至三文魚沙律。」最近勤勤做運動做gym做「上癮」嘅Yumi仲話有時出去做運動,自己簡單整個漢堡包或者三文治方便帶出街。今次嚟到學整雙層芝士手打牛肉巨型漢堡都豁出去豪食一餐,笑説做廚師要調味同試味。負責準備食材,手打牛肉嘅Yumi以佢手瓜起展嘅手連續打咗20分鐘,Yumi話當做咗一Part運動,連在場男大廚都讚佢夠手力。愛貓如命嘅Yumi近排除左比貓貓「主子」食貓糧貓罐頭外。有研究開食譜嘅佢仲喺貓貓討論區入面同一眾愛貓之人交流自製貓食物嘅食譜,等貓有時都可以食啲啱佢哋食嘅新鮮食材,更加平衡營養。

而麥貝夷(Karene)最近都有相約朋友睇足球賽事,有時凌晨叫快餐店漢堡包總覺得自己學自己整啱自己口味嘅巨型漢堡應該仲好味。身為「絕世稱職女友」嘅Karene以前都會經常為男友下廚,更加會照顧對方平衡營養,炮製埋愛心飯盒比對方,被讚係稱職女友。目前單身嘅佢話真係Focus喺工作。兼任英文老師嘅佢最近因小朋友放暑假都要調整一下教材,以英語戲劇遊戲形式同小朋友上英文輕鬆暑期班:「小朋友真係精力旺盛,可能之前疫情又少咗出去放電,成班10個小朋友一出嚟上堂非常雀躍興奮。差啲要出動大聲公先可以控制佢哋乖乖上堂。」

學識咗整巨型漢堡包嘅Karene話上英文堂時「利誘」小朋友們只要佢哋乖乖上堂,暑假完結喺小小畢業禮上會自製漢堡包同「精美兒童餐」同佢哋開畢業Party。果然之後小朋友真係乖咗,佢笑笑口咁話其實小朋友真係容易氹,天真無邪,世界好簡單。除咗兼任英文老師外,同時兼任幕前工作的Karene表示最近為以分離症為題嘅新戲《解離(Inside Me)》擔任女主角,更會同男主角-天堂鳥嘅成員許俊豪(Lincoln)有對手戲。

Corner Garden:
九龍觀塘觀塘道472-484號官塘工業中心一期1樓F室