蘇慧恩穿婚紗為葉文龍拍新歌《一頁傳奇》ＭＶ 拍到中暑

藝人葉文龍日前為新歌《一頁傳奇》拍攝MV，由晴朗執導，蘇慧恩Ophelia 擔任女主角。當日一行13人赴抵東坪洲取景，氣溫高達32度，島上面無遮無掩，過程相當辛苦，為拍靚景，多位工作人員受傷。

葉文龍擔心地表示：「拍攝當日，烈日當空陽光燦爛，拍攝團隊背著攝影器材上山下海，十分辛苦，真的非常感謝他們，當中更有工作人員受傷，希望同事快啲好返。」

另外，蘇慧恩出現輕度中暑，暴曬太久而眼前一黑，蘇慧恩表示：「因為拍攝當日實在太曬太熱，我要著住婚紗行咗大半個東坪洲，熱到抖唔到氣咁滯，所以有少少休克嘅感覺，好彩之後坐低休息咗一陣飲番啲水就冇咩事喇。」

蘇慧恩被問及有沒有後悔接拍？她回應：「咁又唔會，因為葉師父平時教我打拳都好俾心機，佢有MV要拍，當然要幫忙啦。事實上今次亦都覺得平時學拳係有幫助嘅，以前我行山好快就喘氣唔舒服，今次拍足全程都幾乎唔覺攰，我都覺得自己進步咗。」

導演晴朗被問及覺得拍攝狀況：「十分滿意所有人工作表現，尤其是葉文龍同女主角蘇慧恩十分專業，兩位嘅演出感情到位，結尾亦都盡顯幸福美滿嘅一面，希望快點完成作品給大家欣賞。」連導演都咁滿意，相信「一頁傳奇」MV一定好值得期待。