許嘉浩作客嚴淑明節目分享抗疫美食

日前嚴淑明Mandy在港拍攝飲食節目，宴請識食之人許嘉浩(Karl)作客，Karl  邀請美食達人傅淖鈴、徐月霞、何曼筠等一同出席。Mandy表示自己大多精選既有特色又有營健康嘅私房菜，尤其是在疫情期間大家都要食得有營，飲食平衡，增強抵抗力。佢推介滋補燉湯、含豐富蛋白質又低脂嘅海鮮窩、啖啖肉龍蝦蒸蛋、仲有有營有機嘅五蔬包括鮮淮山、南瓜、秋葵、菜花、茄子。加上抗疫高纖通便排毒嘅羽衣甘藍，原來100克羽衣甘藍含有4克纖維，足足多過2個橙。當然最後有潤肺強肺嘅清潤糖水。
著名形象指導許嘉浩(Karl Hui)與女星嚴淑明(Mandy)相識多年，大家都好貪靚，除咗會分享美容護膚心得外，仲會傾養生同飲飲食食。Karl話幾年前喺廣州傾登台工作時碰見零化妝嘅淑明姐，同以前見佢打扮成台灣性感女星造型時差唔遠，大呼對方對皮膚保養得宜。二人在廣州講美容經由下午講到夜晚，又去咗食當地地道河鮮小菜，更發覺大家鍾意飲湯去養生。

Karl邊食邊傾，自細被稱「湯霸」嘅佢每日一定要飲一個燉湯或老火湯，遠遠比廣東人有時飲嘅滾湯或紫菜蛋花湯滋補養生得多。佢更推介大家煲虎乳靈芝五指毛桃蟲草花豬腱湯強肺健身。疫情下大家Stay Home人人變廚神，Karl大讚媽媽確實係隱世廚神，中西美食皆通。佢仲幫媽媽開咗個Cooking專頁，每人upload一日三餐美食連食譜上網，單單一日已有愈一百二十個留言問食材整法。講到書展延期，Karl都話今年原本幫八本新書做宣傳嘅計劃都要大變，但最緊要大家身體健康。仲話宜家有多幾個月時間，可能趕得切幫媽媽籌備多本食譜，等書展重開推出。拍攝後大家都不忘戴上口罩，Karl更每星期定期親手包裝口罩送上給Stay Home的長者及有需要人士。