雷深如 JArie 《雙面哈菲》 音樂與演戲集於一身

《雙面哈菲》- 個個都問雷深如 JArie邊個係「哈菲」，佢係Harvey Dent – DC蝙蝠俠漫畫同埋電影入邊，半邊面係好人，半邊面係爛晒面嗰個雙面人，就係Harvey (哈菲）啦!

前幾日出咗電視禁播版MV，估唔到反應係咁！聽眾竟然係鍾意！當初我諗左畫面同埋concept, 拎埋Storyboard搵我個導演朋友阿Lam，而家真係喺MV視覺上幫我實現晒! 拍完MV之後，我同導演用咗四個月時間，逐個逐個shot一齊剪片，可謂由音樂至呢個MV都係一手一腳參與。

MV既故事解讀，主要係講我討厭虛偽同埋假笑嘅自己，感覺好似只係一個軀殼，連自己嘅心臟都唔再跳…. 所以好想用盡所有自毀嘅方法，毁滅自己。最後自毀不遂，俾人捉咗去做電療。電療令到我嘅人生走馬燈呈現，令我有所領悟，發覺原來呈現真實嘅自己，就算係呈現黑暗面，只要自己開心，就算全世界唔認同同埋覺得你瘋癲都冇所謂。你已經可以圓滿你自己。最後，我個心臟變咗黑色，但係佢終於有心跳，我又返生命啦！

呢個MV簡直就係將音樂同埋演戲集於一身！音樂一直推進同埋變得高昂，我嘅演繹就要有幾忘我同埋豁出去! 其實嗰種瘋癲，絕對係我內心一直嘅掙扎同埋吶喊。今次最高興嘅事就係可以將音樂同埋MV真正合一，有聽眾話可謂相得益彰！

《雙面哈菲》係我離開唱片公司後第一首歌，亦只不過係故事嘅開端。以下落嚟嘅歌，希望大家繼續期待！