UTO娛樂|超人的能量 | 林超榮: 要揾食，先考「牌」
【防疫絕招】終於有直接噴霧人身體殺菌嘅產品，仲可以殺滅空氣中嘅病菌
【UTO娛樂|超人的能量|林超榮】要搵食，先考「牌」
搵食艱難，疫情又肆虐，電影人北上開工都係遙遙無期。
攝影師朋友自一九年年尾回港，賦閒在家都九個月。他說：「坐食山崩，不是有辦法，再這樣下去，一班精英，都會變耆英，要想定後路。」
我問：「你有乜後路？」
「必要時都要去做看更。」
「看更都要考牌，不是人人可以做保安。」
「再唔係駕的士。」
「的士都要考個牌啦。」
他果然的起心肝，坐言起行，去考的士牌。我打蛇隨棍上，提議考多幾個牌傍身。不如考埋地產代理牌、保險代理牌、旅行導遊牌，最好，再考多個調解人牌，到時有牌在身，正職做不來，兼職也無妨。
我反正都是自由身，撈多幾個有牌，到時一條龍服務，真係唔憂無嘢做。
日頭開工做導遊，可以周圍去，見多識廣。你身兼地產代理，到時認識內地旅客，一邊旅遊，又一邊介紹睇吓樓，一億的樓賣不出，又可以游說他們買保險。
開工途中，遇到有同事爭吵，又可以調解員身份和他們排難解紛，以和為貴。真係功德無量。
隔行如隔山，行行出狀元。要做出成績，並不容易。我們閒時兼職，不過是到此一遊，見識一下，擴闊人脈，就當寫劇本，資料搜集，做節目，親身現場採訪。總之，現代高端社會，事事講資格，你不去考幾個「牌」，做個有牌人士，先至有資格排隊搵食。
林超榮
#林超榮 #超人的能量 #UTO娛樂
